Beampte van DKD ontslaan

ODENDAALSRUS. – Mnr. Cobus Mouton, beampte van korrektiewe dienste (DKD) op dié dorp wat met Volksblad gepraat het oor sy skorsing en afdanking wat volgens hom onregmatig was omdat hy die departement se staande bevele uitgevoer het, is gister summier ontslaan.

Dié ontslag is net ’n dag ná die berig oor hom en ’n dronk kollega in Volksblad en op dieselfde dag wat mev. Puleng Mokhoane, woordvoerder van DKD, gesê het sy appèl is nog nie afgehandel nie en die departement kan dus nie kommentaar lewer nie.

Volksblad het Woensdag berig Mouton het geweier om ’n gevangene alleen in die hospitaal te gaan oppas. Volgens DKD se staande bevele moet dit deur minstens twee beamptes gedoen word. Hy het teen sy afdanking appèl aangeteken en wag reeds maande vir die uitslag daarvan.

Gistermiddag is ’n brief van die kommissaris aan hom oorhandig waarin hy van sy ontslag verwittig word. Mouton sê hy gaan dit beslis nie daar laat nie.

In dieselfde berig oor Mouton het Volksblad berig oor sy kollega wat helder oordag, in uniform geklee en aan diens, só dronk was dat hy nie op sy voete kon staan nie. Volksblad het foto’s uit ’n video gepubliseer waar duidelik gesien word hoe die beampte op sy boude by die voordeur van die gevangenis uitskuif en wat sy kollegas se kommentaar daarop is.

Mokhoane het gister eers gereageer op ’n navraag wat Volksblad Maandagaand aan haar gerig het.

Sy sê die aangeleentheid rakende die beampte op die video is deur die departement dissiplinêr hanteer. Sy sê wat vir bestuur verrassend is, is dat ’n voorval wat verlede jaar plaasgevind het, nou eers soveel aandag kry.

“Hoe het Volksblad die video en foto’s bekom? Was daar ’n beampte wat sy of haar selfoon ingesmokkel het? Hoekom is dit nie na die bestuur gestuur nie?”

Volksblad het berig dat die selfoonvideo wél onder die bestuur se aandag gebring was en by die DKD se kantore op Odendaalsrus, Virginia en Kroonstad gesien is.