ANCYL: Gwede, jy is ’n probleem
2010-08-26 09:48
- Artikelopsies
- Deel
- Kry Volksblad op
Johannesburg - Afgevaardigdes het met een doel na die ANC-jeugliga se nasionale hoofraadsvergadering (NGC) gestroom: Vir ’n resolusie om druk op die ANC uit te oefen om teen 2012 minstens een “jeugdige” tot sy topleierstruktuur te verkies.
Gwede Mantashe, sekretaris-generaal van die ANC, is die teiken van dié veldtog en Fikile Mbalula (39), voormalige jeugleier en adjunkminister van polisie, die “jong bloed” wat hom moet vervang.
Die afgevaardigdes het Woensdagaand by die konferensiesaal by Gallagher Estate in Midrand luidkeels prysliedere vir Mbalula en Julius Malema, jeugligaleier, gesing.
Baleka Mbete, ANC-voorsitter, en Malusi Gigaba, adjunkminister van binnelandse sake en ’n voormalige jeugleier, en Nathi Mthethwa, minister van polisie, het saam met die jeugliga se senior leiers voor op die verhoog gesit.
“Die hoofdoel van die NGC is om ’n resolusie te aanvaar om Mbalula vir SG (sekretaris-generaal) te steun.
Vergeet maar eers van die nasionalisering van die myne; dít (om van Mantashe ontslae te raak) is hoekom ons hier is,” het ’n afgevaardigde van Limpopo vroeër gesê.
’n Groep jeugdiges van die Oos-Kaap, een van die jeugliga se invloedrykste provinsies, het eerste in Midrand aangekom.
“Gwede, wat jy doen is nie reg nie. Jy is ’n probleem,” is voetstampend gesing.
Die provinsie is onwrikbaar daaroor dat die ANC nie onbepaald op “ou mense” kan steun om die regerende party te lei nie.
Hulle meen die ANC moet ’n strategie volg waar jongmense geleidelik in leiersposisies opgeneem word.
“Ons hou van Gwede, maar hy is oud. Hy moet huis toe gaan. Ons soek vars bloed (binne die ANC).
“Ons wil darem één jongmens in die topses (leiersposisies) hê,” het ’n afgevaardigde verduidelik.
Hy het Mbalula as ’n “goeie” en “geskikte kader” beskryf. “Hy kom van die jeugliga. Hy is een van ons.”
Die Oos-Kaap het verlede week aangekondig hy steun Mbalula om Mantashe te vervang.
Teen gistermiddag was daar aanduidings dat afgevaardigdes van Limpopo en KwaZulu-Natal daarmee saamstem.
Die NGC het eers teen 18:00 – byna sewe uur laat – begin weens ’n gesukkel om afgevaardigdes van Mpumalanga, die Vrystaat en die Noord-Kaap te registreer.
Die meerderheid van die sowat 3 000 afgevaardigdes het dié meevaller benut deur in Midrand se winkelsentrums rond te dwaal en op grasperke te ontspan.
Van Malema was daar vroeër die dag geen teken nie.
Net Andile Lungisa, die jeugliga se onderleier wat Malema volgende jaar die stryd om die presidentskap wil aansê, het ’n rukkie lank met ondersteuners gesels.
Die broeiende leierstryd tussen hom en Malema is gekenmerk deur groepies singende mense wat in die parkeerterrein vergader het.
“Julius, jy is wonderlik. Jy is soos Fikile,” het die een lied gelui.
’n Groep van die Oos-Kaap het egter nie doekies omgedraai nie: “Andile Lungisa, voertsek!”