Spurs ‘speel met glimlag’
2012-01-12 21:57
LONDEN. – Tottenham Hotspur maak die wêreld warm vir die twee Manchester-sokkerspanne in die Engelse Premierliga.
Spurs se sege van 2-0 eergisteraand oor Everton beteken hulle is nou net drie ligapunte agter die voorloper, Manchester City, en gelyk met Manchester United, hoewel United ’n beter doeleverskil het.
United is die kampioenspan en is oor die afgelope dekade verskeie kere as kampioen gekroon, maar City en Spurs het nog nie sedert die jare sestig in die liga sukses geproe nie.
Harry Redknapp, Spurs se afrigter, het gesê hy voel geen druk op sy span nie.
“Al die druk is op City, want as jy kyk na die hoeveelheid geld wat hulle bestee het om spelers soos Sergio Aguero, Edin Dzeko en Samir Nasri te bekom, is hulle veronderstel om te wen.”
City het juis eergister met 0-1 teen Liverpool verloor in die halfeindstryd van die Carling Cup nadat United hom ook Sondag in die FA Cup uitgeskakel het.
Aaron Lennon en Benoit Assou-Ekotto het Spurs se doele teen Everton aangeteken.
“Ons plaas geen druk op ons spelers nie en geniet dit dat ons goed speel. Ons speel met glimlagte op ons gesigte,” het Redknapp gesê.
“Dit is nie onmoontlik dat ons die liga kan wen nie.
“Dit sal moeilik wees, maar ons speel goed en enigiets kan gebeur.”
Hul doelwit is om seker te maak hulle eindig tussen die voorste vier op die puntelys en speel aanstaande seisoen weer in die Kampioeneliga.
Spurs is ook die voorste klub van Londen en is agt punte voor Chelsea en ’n verdere punt voor Arsenal. – Sapa-AP
- Volksblad