SA wil grotes pak gee
2011-11-08 22:59
PORT ELIZABETH. – Die kragmeting met die Ivoorkus het dalk nie op die regte tyd vir Bafana Bafana gekom nie, het Pitso Mosimane, die Suid-Afrikaanse sokkerspan se afrigter, gister gesê.
Dié spanne pak mekar Saterdag hier in die Nelson Mandelbaai-stadion in die Nelson Mandela-uitdaagwedstryd.
“Die profiel van die Ivoorkus spreek vanself,” het Mosimane gesê.
“Die span is nommer 1 in Afrika en nommer 19 in die wêreld. Dit sou dalk beter gewees het as ons ’n bietjie later teen hulle gespeel het.
“Ons het respek vir die Ivoorkus, maar ons het nie oordadige respek nie.
“Dis moeilik om teen so ’n sterk span te wen, maar dis moontlik en ek glo ons kan wen.”
Volgens Mosimane verkies hy dat Bafana Bafana voortaan al meer teen sterk spanne vriendskaplike wedstryde moet speel.
“Ons kan teen swak spanne speel en wen, maar dit gan nie soveel beteken as wat ons teen ’n sterk span speel en wen nie,” het hy gesê.
“Ons moet nie bang wees om teen sterk spanne te speel nie. Ek is nie, al plaas ek my werk op die spel. Ons moet nie wegkruip nie.
“Dit alles gaan oor voorbereiding vir 2014 se Wêreldbeker-toernooi.
“Dis waarom ons nou meer na ons jonger as na ons ouer spelers kyk wanneer ons ’n span kies.”
Hoe hoog Mosimane die Ivoorkus aanslaan, was duidelik uit sy antwoord op ’n vraag as wie hy dié span se gevaarman sien.
“(Didier) Drogba is uit (hy ondergaan ’n arm-operasie), maar daar is nog steeds soveel goeie spelers,” het hy gesê.
“Ek kan nie eintlik een uitsonder nie. Noem maar op, die een ná die ander speler is goed.”
Mosimane sal nie Saterdag die verdediger Bongani Khumalo kan kies nie.
Dié speler, wat sy klubsokker in Engeland vir Reading speel, sukkel met ’n enkelbesering.
Verskeie spelers, waaronder Bradley Grobler en Siyabonga Songweni, sukkel met verkoue, maar sal glo reg wees.
Daar was ook kommer oor die middelvelder Teko Modise se knie, maar ook hy is reg vir die kragmeting.
“Ek moet nog besluit oor die samestelling van my span,” het Mosimane gesê.
- Volksblad