Mosimane wil sien wat jonges kan doen
2011-11-13 23:02
PORT ELIZABETH. – Die “ou manne” van Bafana Bafana het ’n slag gewys wat in hulle steek en nou is dit die “jong manne” se kans.
Só het Pitso Mosimane, afrigter van Bafana Bafana, gesê nadat sy span Saterdag ’n goeie vertoning teen Afrika se voorste sokkerland, die Ivoorkus, gelewer het.
Dié Nelson Mandela-uitdaagwedstryd in die Nelson Mandelabaai-stadion het met 1-1 gelykop geëindig.
Môre speel Bafana in Harare in nog ’n vriendskaplike wedstryd teen Zimbabwe.
Mosimane het besluit om verskeie van sy eerstekeuse-spelers by die huis te los.
“Dis duidelik dat ek nuwelinge in hierdie wedstryd sal kies. Ek wil sien wat die jong manne kan doen,” het Mosimane gesê.
“Die voordeel is dat baie van Zimbabwe se spelers in die Premierliga speel, so my spelers sal nie geïntimideer voel nie.”
Sy sogenaamde “ou spelers” het hulle ook nie deur die groter, sterker manne van die Ivoorkus laat intimideer nie.
Daar was wel ’n tydperk voor rustyd toe dit gelyk het asof die besoekers besig was om die oorhand oor die tuisspan te kry.
Dit was nadat Bafana se Siboniso Gaxa per ongeluk die bal in sy eie doelhok laat beland het.
Gaxa, wat die beseerde Tshepo Masilela as verdediger vervang het, het andersins stewig vertoon.
Net ná rustyd het Steven Pienaar, die tuisspan se kaptein, ’n gesigbesering opgedoen.
Hy en sy maats het hulle egter nie daardeur laat ontstel nie en het in die tweede helfte met meer vuur as die besoekers gespeel.
Hulle het ’n paar kanse geskep en was dalk ongelukkig om net die een doel, deur die doelskieter Katlego Mphela, te kry.
Mphela het die doel in die 53ste minuut aangeteken toe hy ’n vryskop verby die Ivoorkus se doelwagter, Boubacar Barry, gestuur het.
“Ek het altyd ’n kragmeting verwag waarin ons ten volle moes konsentreer,” het Mosimane gesê.
- Volksblad