Meer as City se eer op die spel

LONDEN. – Manchester City kry vanaand teen Wigan Athletic in die Engelse Premierliga die kans om weer sy voorsprong van drie punte op die puntelys terug te wen.

Die City-sokkerspan is steeds die liga se voorloper, maar is gelyk aan Manchester United op 48 punte nadat laasgenoemde Bolton Wanderers Saterdag met 3-0 kafgedraf het.

City het nie die naweek gespeel nie, maar sy kans kom vanaand in die DW-stadion in Wigan aan die beurt.

In die afgelope agt weke het City vier wedstryde verloor en die klub sal die situasie wil beredder alvorens dit hom van die liga-voortou ook ontneem.

David Silva, ’n opwindende spelskepper van City, behoort sy terugkeer in die wedstryd te maak nadat hy verlede week se Carling Cup-halfeindstryd teen Liverpool weens ’n enkelbesering misgeloop het.

Vincent Kompany is vir nog drie wedstryde geskors ná ’n onlangse rooikaart in ’n FA Cup-wedstryd teen Manchester United, terwyl die broers Yaya en Kolo Toure hulle by die Ivoorkus se span vir die Afrikabeker-toernooi aangesluit het.

In United se sege oor Bolton het die 37-jarige Paul Scholes, wat onlangs met ’n skokbesluit sy uittrede laat vaar het om weer vir die Red Devils te speel, die span se eerste doel aangeteken.

Dit was sy 103de Premierliga-doel en kom net minder as 18 jaar sedert hy sy eerste doel in die liga behaal het.

Doele laat in die wedstryd deur Danny Welbeck en Michael Carrick het Bolton se lot verseël.

Tottenham Hotspur het ’n geleentheid om soos City en United tot 48 punte op te skuif verspeel deur met 1-1 op sy tuisveld teen Wolverhampton Wanderers gelykop te speel.

Wolves het Spurs geskok deur vroeg ’n voorsprong te neem danksy ’n doel deur Steven Fletcher, maar Spurs het ná rustyd met ’n Luka Modric-doel teruggeslaan.

Chelsea moes op sy beurt hard werk vir ’n oorwinning van 1-0 oor Sunderland.

Liverpool se hoop om tussen die topvier-spanne op die puntelys te eindig, is ’n terugslag toegedien toe hy die louere met Stoke City (0-0) gedeel het.

Swansea City het gister verras deur Arsenal met 3-2 te klop.

- Sapa - AFP