Liverpool sonder Suarez

2011-12-29 21:28

KAAPSTAD. – Liverpool pak Newcastle vanaand in die Engelse Premierliga sonder sy omstrede doelskieter Luis Suarez.

Suarez is wéér in die pekel nadat hy tydens sy span se nederlaag vroeër vandeesmaand teen Fulham ’n obsene teken vir die tuisskare gewys het.

Die Engelse Sokkervereniging (FA) het hom gister vir ’n wedstryd geskors en ’n boete van £20000 opgelê.

Die sokkerklub is ook met £20000 beboet omdat hy nie sy spelers – Jay Spearing is van die veld gestuur – in dieselfde wedstryd kon beheer nie.

Suarez se jongste manewales kom slegs ’n week nadat hy vir agt wedstryde geskors is omdat hy tydens ’n wedstryd in Oktober ’n rassistiese opmerking teenoor Manchester United se verdediger Patrice Evra gemaak het.

Hoewel Liverpool erken dat die spelers verkeerd opgetree het deur met die skeidsregter te argumenteer nadat Spearing afgestuur is, aanvaar die klub nie die boete vir die oortreding nie.

Suarez het sy jongste klag van onbehoorlike gedrag beken, maar sy skorsing van agt wedstryde is nog nie afgedwing nie omdat Liverpool 14 dae het om teen sy skorsing te appelleer.

Die FA het in ’n verklaring die klub én Suarez oor hul optrede in die toekoms gewaarsku.

Liverpool het nie op Suarez se skorsing of die klub se boete kommentaar gelewer nie.

Kenny Dalglish se troepe is sesde op die puntelys op 31 punte ná hul gelykop-uitslag (1-1) tuis teen Blackburn Rovers.

Dit is slegs een plek bo Newcastle (30) wat sewende lê.

Liverpool is nou twee punte agter Arsenal (33) en drie punte agter Chelsea (34) wat vierde lê.

Die kragmeting is van kardinale belang vir Liverpool omdat net die boonste vier spanne aan die einde van die seisoen vir die Kampioeneliga kwalifiseer.

Intussen het Suarez steun uit ’n onverwagse oord gekry toe die Suid-Afrikaanse krieketspeler Ashwell Prince, ’n groot Liverpool ondersteuner, sy steun op Twitter aan Suarez toegesê het. “Dit sal beter wees vir Suarez om Spanje toe te gaan. Daar sal hy saam met beter spelers in ’n beter liga speel.”

Prince het ook uitgevaar teen die FA: “Die FA is ’n grap. Hulle beskuldig ’n man van rassisme en skors hom dan vir dieselfde oortreding waarmee drie van hul eie mense weggekom het. Praat van diskriminasie.”

Andy Carroll behoort in Suarez se plek te begin. Carroll het gesukkel sedert hy in Januarie vir sowat R420 miljoen by Newcastle gekoop is.

Hy het daarmee een van die duurste spelers tot nog toe geword en dit lyk of dit ’n invloed op sy spel het. Hy het nog net twee doele dié seisoen aangeteken en moes meestal vir Suarez terugstaan. Gerugte oor sy drinkgewoontes doen ook steeds die ronde. – Sportredaksie

- Volksblad