G’n ruskans vir Bafana

Johannesburg - Bafana Bafana het gister skaars in Brasilië geland toe dit skouer aan die wiel was ter voorbereiding vir die Wêreldbeker-sokkertoernooi.

Die breier van die Suid-Afrikaanse span, Carlos Alberto Parreira, het sy groep van 29 spelers gisteraand reeds gedril, nadat hulle net vyf uur vroeër by die Granja Comary-oord in die idilliese Teresopolis, naby Rio de Janeiro, aangekom het.

Dié oefenkamp, waar Parreira sy Brasiliaanse span geslyp het voor hul Wêreldbeker-glorie in 1994, sal Bafana se vier oefenwedstryde teen Brasiliaanse spogklubs huisves.

Hulle sal dan in Itu, naby Sao Paulo, laer trek vir die kragmeting met die hoogaangeskrewe Paraguay.

“Ek voel nog soos ’n zombie, maar ons almal is baie opgewonde om hier te wees. Die geriewe is van wêreldgehalte,” het Lance Davids, ’n Bafana-middelveldspeler, aan kickoff.com gesê.

“Carlos het met die intrapslag gesê die harde werk begin nou en dat ons geen tyd het om te mors nie."

Terselfdertyd het Matthew Booth, ’n uithaler-verdediger van Bafana, gesê dié kamp kan bepalend wees vir Suid-Afrika se kanse om in Junie teen sy teenstanders in Groep A, Mexiko, Uruguay en Frankryk, staande te bly.

“Dis goed vir ons om uit die kollig (in Suid-Afrika) te kom,” het Booth aan bbc.co.uk gesê.

“Ons het momentum verloor sedert verlede jaar se Konfederasiebeker-toernooi, toe ons gewys het dat ons vir geen span ter wêreld hoef terug te staan nie.”

Bafana het tóé beïndruk in hul wedstryde teen die sokkerreuse Brasilië en Spanje, maar kon sedertdien net 3 van hul laaste 14 kragmetings (teen Zimbabwe, Swaziland en Madagaskar) wen.

Parreira sal boonop tot minstens Mei moet wag om op die knoppies van sy Europese sterspelers, onder wie Steven Pienaar en Benni McCarthy, te druk.

McCarthy sukkel nog met die kniebesering wat hy in sy eerste wedstryd vir sy Engelse klub, West Ham United, opgedoen het.
 
“Benni is vol vertroue dat hy betyds sal herstel en ons hou almal duim vas,” het Booth gesê.

- Volksblad