Gelapte Bafana speel gelykop teen Zambië

RANDSE STADION. – ’n Uitgedunde Bafana Bafana-sokkerspan het gistermiddag hier daarin geslaag om ’n gelykop uitslag van 1-1 teen die Zambiërs af te dwing.

Die Suid-Afrikaanse Sokkervereniging (Safa) het dié kragmeting se status tot ’n oefenwedstryd verlaag en die handjievol toekouers was skaars genoeg om een van die vier paviljoene in die stadion met sitplek vir 25000 toeskouers vol te maak.

Die Suid-Afrikaners het selfs gedreig om in hul oefentruie te speel en daar is vooraf bespreek of die spanne moet afwyk van die normale reëls.

Maar Bafana Bafana het in hul wedstrydtruie opgedraf en die wedstryd is in twee helftes van 45 minute elk beslis.

Die besoekers het die septer in die eerste helfte geswaai en die voortou ná agt minute geneem toe Stoppila Sunzu die bal met sykopindieSuid-Afrikaanse doelhok ná ’n hoekskop gestamp het.

Suid-Afrika het egter teen die middel van die eerste helfte begin terugveg en verskeie kanse gekry om doele aan te teken.

Zambië was met die rustyd nog voor en dit het vroeg in die tweede helfte gelyk of hy sy voorsprong gaan vergroot.

Suid-Afrika het egter die enigste doel in dié helfte in die 12de minuut aangeteken met ’n kopskoot deur Ayanda Gcaba.

Suid-Afrika het in die laaste halfuur goed vertoon teen ’n span wat aan die Afrikabeker-toernooi gaan deelneem en meer kanse as die besoekers geskep.

Suid-Afrika speel Sondag in Phoken buite Rustenburg in nog ’n oefenwedstryd teen Ghana. – Sapa

- Volksblad