City se spelers oor kole gehaal
2012-01-02 21:12
SUNDERLAND. – Sokker bestaan uit meer as net aanvallende spel, het Manchester City se afrigter, Roberto Mancini, sy span gister geroskam.
Mancini het sy spelers die leviete voorgelees nadat hulle Sondag met 0-1 in die Stadium of Light teen Sunderland vasgeval het omdat hul verdedigingslinie slapgelê het.
City is die voorloper in die Engelse Premierliga, maar nou net danksy ’n beter doeleverskil nadat Sunderland se Suid-Koreaanse aanwins, Ji Dong-Won, die sege in beseringstyd beklink het.
City sal ekstra bitter wees oor die nederlaag, want ’n oorwinning sou hom drie punte voor sy naaste teenstander, Manchester United, op die puntelys geplaas het. United het ook vroeër met 2-3 tuis teen Blackburn vasgeval.
City sal Liverpool vandag pak. Liverpool is sesde op die puntelys, en fris en vars nadat hy Newcastle met 3-1 geklop het. Mancini sal nie wil sien dat sy span nie twee keer agtereenvolgens dieselfde fout begaan nie.
“Die doel deur Sunderland is ná onkantspel aangeteken, maar ek het nog nie met die skeidsregter daaroor gepraat nie,” het Mancini gesê.
“Ek ken sokker en om daardie rede het ek die laaste 15 minute van die wedstryd myself hees geskree om die verdediging bymekaar te hou. Dit het gelyk of ons met tien spelers wou aanval en dit is onmoontlik. Ek weet nie hoeveel kanse op doele ons gehad het nie, maar wat my bekommer is dat daar spelers op die veld moet wees wat weet wanneer ons weerbaar is vir teenaanvalle.
“Ons moet dit verbeter. Ons het kanse gehad om doele aan te teken en dit nie benut nie. Maar wanneer jy soms nie ’n wedstryd kan wen nie, moet jy seker maak dat jy nie verloor nie.”
Mancini, wat die doelskieter Mario Balotelli vir die kragmeting met Sunderland ruskans gegee het, het gesê: “Ek hoop nie dit is te moeilik om vir die Liverpool-stryd span te kies nie. Die nederlaag is nou iets van die verlede en ons moet nou aanbeweeg.”
Sunderland het net een van sy eerste vyf wedstryde verloor nadat Martin O’Neill in Steve Bruce se plek as breier aangestel is. Die sege oor City beteken hy is ses punte weg van die relegasiesone.
“Vir ons was die wedstryd uitsonderlik. City het die laaste 20 minute buite ons doelhok gespeel. Dit was ongelooflik hoe die ondersteunende spel daar was toe ons die wegbreekkans gekry het. Ek voel jammer vir hulle. Selfs met die spelers tot hul beskikking moet hulle teen Liverpool, wat byna twee dae gerus het, speel,” het O’Neill gesê. – Sapa-AFP
- Volksblad