Tobie al ’n ‘Italianer’, maar hy braai nog boerewors

JOHANNESBURG. – Dit is nou wel duisende kilometer ver van die Boland en die plaaslewe waarmee Tobie Botes grootgeword het, maar dit sal sy verwagte toetsrugby-buiging vandag vir Italië nie ’n snars minder spesiaal maak nie.

Botes (27) is een van Italië se plaasvervangers wanneer die Sesnasies-reeks vandag in Parys teen die kampioen, Frankryk, begin.

Hy sluit hom in die span by die slotte Corniel van Zyl en Quinton Geldenhuys as Italië se aangenome Suid-Afrikaners aan.

As hy speel, sal sy toetsdroom bewaarheid word slegs sowat drie en ’n half jaar nadat hy Suid-Afrika as ’n talentvolle Griekwas-skrumskakel verlaat het.

“Ek moes 36 maande wag voordat ek (vir Italië) kon kwalifiseer en dit het verlede jaar tydens die Wêreldbeker gebeur,” het Botes gister uit “’n bitter koue Parys” aan Sport24 gesê.

Die voormalige Springbok-breier Nick Mallett het Italië tydens die Wêreldbeker gebrei, maar Mallett se opvolger, die Fransman Jacques Brunel, is die eerste wat ’n kans het om Botes in die Italiaanse trui in te span.

Botes was nie aanvanklik in die Sesnasies-groep nie, maar ’n besering aan die losskakel Luciano Orquera het Brunel genoop om hom nader te trek.

Botes kan sowel skrumskakel as losskakel speel.

“Ek het hierdie week (vir die eerste keer) kans gehad om saam met Brunel te werk en tot dusver is alles great.

“Hy is ’n baie rustige afrigter en het my dadelik welkom laat voel hier by die span,” het Botes gesê.

Die Benetton Treviso-klub vir wie hy speel, is nou ook al sy “tweede huis” naas Suid-Afrika.

“Dis nou my vierde jaar hier en ek en my vrou, Danelle, geniet dit verskriklik baie. Treviso is ’n ongelooflike mooi plek, dis naby aan Venesië en redelik sentraal geleë.

“Ons bly in ’n klein dorpie (Paese) net buite Treviso. Dis baie rustiger en aangesien ek en Danelle van ’n plaas af kom, is dit die naaste aan die plaaslewe, wat ons albei baie mis. Ek sal heel moontlik my rugbyloopbaan hier klaarmaak,” het hy gesê.

Botes se afrigters by Treviso is albei Suid-Afrikaners, naamlik Franco Smith en Marius Goosen, terwyl spelers soos Van Zyl, Willem de Waal en Bian Vermaak ook vir Treviso speel.

“Om vir Marius en Franco as afrigters hier te hê, het die aanpassing van Suid-Afrika na Italië soveel makliker gemaak,” bieg hy.

“Ons probeer ons weeklikse braai inkry. Die vrouens maak braaibroodjies, ons braai tjoppies en ons eie boerewors wat ’n slaghuis hier in Treviso vir ons maak met ons Suid-Afrikaanse speserye.”

- Volksblad