Stick, Mbiyozo sal moet uithaal teen Bulls in Baai
2012-02-02 22:33
PORT ELIZABETH. – Môre se verpligte vriendskaplike wedstryd hier in die Nelson Mandelabaai-stadion tussen die rugbyspanne van die Southern Kings en die Bulls is vir twee voormalige Blitsbokke ’n belangrike een.
Die heelagter Mzwandile Stick en die flank Mpho Mbiyozo is reeds vroeg onder druk om te wys dat hulle die regte keuses vir die Kings is.
Sedert die twee voormalige Blitsbok-uitblinkers hulle op vyftienman-rugby toegespits het, het hulle gemengde welslae behaal.
Dat hulle knap spelers is, is ’n feit. Tog sukkel dié twee om altyd die eerstekeuse-spelers in hul onderskeie posisies by die Oostelike Provinsie én by die Southern Kings te wees.
Met SP Marais nog buite aksie weens ’n besering, kry Stick ’n slag weer kans om sy vaardighede as heelagter vir die Southern Kings uit te stal.
Spelers soos die ervare Tiger Mangweni en die Suidwestelike Distrikte se Elric van Vuuren blaas egter in sy nek.
As hy nie sy kans aangryp nie, kan hy volgende week se wedstryd teen die Stormers van die kantlyn aanskou.
Ook vir Mbiyozo is daar baie op die spel.
Of hy saam met Luke Watson en Devin Oosthuizen die beste lostrio vir die Kings vorm, is debatteerbaar.
Dis moeilik om te sien hoe die indrukwekkende Vleis Engelbrecht nie die beginspan sal haal nie.
Gareth Krause en Roy Bursey, die twee flanke wat verlede week teen die Cheetahs gespeel het, plaas ook druk op Mbiyozo.
Die Kings se slotte, Darron Nell en David Bulbring, sal ook moet wys hulle is beter keuses as manne soos Wayne van Heerden, Barend Pieterse en Giant Mtyanda.
Nell, Pieterse en Van Heerden het ook voorheen slot vir die Cheetahs gespeel.
) Hoewel die Bulls nie met hul beste span Baai toe kom nie, sal die Kings dom wees om hulle te onderskat.
Verlede jaar het die Southern Kings ’n verswakte Bulls-span in ’n soortgelyke wedstryd met 23-7 geklop.
“Watter spelers ook al vir die Bulls uitdraf, ek verwag hulle sal hul beste gee,” het Luke Watson, die Kings se kaptein, gesê.
- Volksblad