Rayno, Dusty veg om 14-trui
2012-02-09 22:27
BLOEMFONTEIN. – Hy het die jaar as die gunsteling begin om Rocco Jansen se vleuelmaat vir die Cheetahs in 2012 se Super-reeks te vorm.
Maar Dusty Noble kon nog nie genoeg oortuig om te verhinder dat sy afrigters verdere proefnemings maak om finaal te besluit oor wie op 25 Februarie in Johannesburg die nr. 14-trui teen die Lions sal dra nie.
En as hy nie vandag in Pretoria, en Rayno Benjamin môre in Polokwane, hul breiers genoegsaam oortuig nie, kan dit Cameron Jacobs se kanse op insluiting verbeter sonder dat hy die naweek aan ’n rugbybal raak.
“Ons het nog nie finaal besluit oor ons vleuels nie,” bevestig Hawies Fourie, agterlynafrigter van die Cheetahs.
“Rocco het ’n goeie laaste deel van die Curriebeker gehad en goed in ons opwarmstryde gespeel.
“Op regtervleuel kyk ons tussen Dusty en Rayno. Albei sal die naweek genoeg speelkans kry.”
Noble was aanvanklik vanweë sy goeie spel vir Griekwas in die Curriebeker-reeks in die binnebaan en dit het nie gelyk of dit kopkrap sou verg om die leemte te vul wat Jongi Nokwe se vertrek na die Southern Kings gelaat het nie.
Noble speel egter vandag om 15:00 op Loftus Versfeld vir die Cheetahs se “B-span” teen die Bulls se naasbestes en Benjamin word môre in Polokwane geweeg wanneer dié streke se groot kanonne arm druk.
Fourie sê dié vleuels weet wat hy van hulle verwag. “Ek soek ’n hoë werkverrigting sonder die bal.
“Hulle moet elke kans op die aanval afrond, goed wees onder die hoë balle en druk op die teenstanders sit wanneer ons skop. Die wedstryde teen die Bulls sal ’n goeie toets vir albei wees.”
Oor Jacobs sê Fourie dit is ’n jammerte dat hy in Shimlas se Varsitybeker-wedstryd teen die Ikeys beseer is en op senter speel.
Hy behoort betyds van sy heupbesering vir Maandag se wedstryd teen die Madibaz in die Rosestad te herstel.
“Hy het ’n goeie Curriebeker gehad en was ons eerste keuse op vleuel. Ons sal hom moet vergelyk met wat ons verlede jaar van hom gesien het en wat Dusty en Rayno bied.”
J.J. Harmse berig uit Pretoria die Bulls sal vandag die vertonings van veral Lionel Cronjé, Jean Cook, Daniel Adongo en Rayno Gerber stip dophou.
)Die spanne is:
Blou Bulle:Jurgen Visser, Sampie Mastriet, Ulrich Beyers, Adri Jacobs, Courtnall Skosan, Lionel Cronjé, Ruan Snyman, Jean Cook, Daniel Adongo, Shaun Adendorff, Cornell Hess, Gerrit-Jan van Velze, Rayno Gerber, Bongi Mbonambi, Dawie Steyn. PLAASVERVANGERS: Robbie Coetzee, Louis Alberts, Schalk van Heerden, Victor Hechter, Xander Redelinghuys, Tony Jantjies, William Small-Smith, Travis Ismaiel, Vincent Koch, Marvin Orrie.
Cheetahs: Riaan Smit, Dusty Noble, Jean Stemmet, Barry Geel, Wilmaure Louw, Sias Ebersohn, Tewis de Bruyn, Philip van der Walt, Justin Downey, Johan Wessels, Waltie Vermeulen, George Earle, Lourens Adriaanse, Ryno Barnes, Marcel van der Merwe. PLAASVERVANGERS: Hercu Liebenberg, Eugene Butterworth, Ockie van Zyl, Leon Karemaker, Marnus Hugo, Marnitz Boshoff, Matthew Rosslee, Philip Burger.
Skeidsregter: Tiaan Jonker.
- Volksblad