Pas op Bryce Lawrence, hier kom Piet van Zyl!
2012-01-30 21:44
- Artikelopsies
- Deel
- Kry Volksblad op
PRETORIA. – Tien jaar nadat mnr. Piet van Zyl sy naam in Suid-Afrikaanse rugbygeskiedenis verewig het met ’n duikslag, het hy nou weer ’n skeidsregter in die oog.
Van Zyl het in 2002 opslae gemaak toe hy die Ierse skeidsregter Dave McHugh platgeloop het in ’n toets tussen die Springbokke en die All Blacks in Durban.
Nou is hy op pad Nieu-Seeland toe vir die troue van sy stiefdogter. Maar, skerts hy, hy is lus om mnr. Bryce Lawrence se adres te gaan opsoek.
Lawrence het verlede jaar die mees gehate man onder Bok-ondersteuners geword met sy vertoning as blaser in die wedstryd waarin die Bokke uit die Wêreldbekertoernooi geskakel is.
Baie mense meen steeds dis nie die Wallabies wat die Bokke geklop het nie, maar dié Nieu-Seelandse skeidsregter se fluitjie.
Van Zyl sê hy wil net aan Lawrence se deur gaan klop, en as hy oopmaak, wil hy vir hom sê: “Hello Mr. Lawrence, this is Piet van Zyl.” Maar hy weet ook nie of hy dit vooraf hardop moet sê nie, want dalk keer hulle hom by die lughawe voor.
Oor die destydse duikslag op McHugh sê Van Zyl vandag hy is nie spyt daaroor nie. “Dis hy wat moeilikheid gesoek het, nie ek nie.” Maar hy voeg darem by dat mense wat hom ken, sal kan getuig dat hy nie regtig ’n hoogskop-en-storm-soort-mens is nie. Sy oorlede pa hét hom maniere geleer. Daardie dag het hy egter net geknak.
En nee, sê hy, dis nie waar dat hy lewenslank van Suid-Afrikaanse rugbystadions verbied is nie. Dit was maar net ’n dreigement van mnr. Riaan Oberholzer, destydse besturende direkteur van SA Rugby. Hy kyk nog gereeld rugby. Hy moet nog gaan seker maak van die bepalings, maar hy verstaan daar is ’n Super-15-wedstryd in Auckland voordat hy terugkom Suid-Afrika toe. As hy kan, wil hy beslis gaan kyk.
- Volksblad