Omstrede blaser kry rooikaart

BLOEMFONTEIN

Sanzar se skeidsregterbase het die Aussie Paul Marks, wat Sharks-ondersteuners met verskeie omstrede beslissings die harnas ingejaag het, ’n rooikaart vir sy vertoning met die fluitjie gegee.

Die Suid-Afrikaner Pro Legoete sal ook nie meer in vanjaar se Super-14-reeks as skeidsregter optree nie.

Marks sal ná sy omstrede beslissings in die naweek se wedstryd in Sydney tussen die Sharks en Waratahs “nie weer maklik” in 2010 vir ’n Super14-wedstryd aangestel word nie.

Dié Australiese skeidsregter het onder meer ’n groot blaps begaan deur nie ’n strafdrie in die laaste oomblikke van dié wedstryd aan die Sharks toe te ken nie.

Eerder as ’n strafdrie, het Marks besluit om Kurtley Beale net met ’n geelkaart te straf en ’n strafskop aan die Sharks toe te ken nadat Stefan Terblanche se aangee aan Ryan Kankowski, met ’n oop doellyn wat wink, onwettig deur Beale afgeklap is.

In ’n omsendbrief het Lyndon Bray van Nieu-Seeland gesê die skeidsregterbase het vandeesweek, net soos die afrigters, “harde” besluite geneem.

“Albei Paul Marks en Pro Legoete het die boodskap gekry dat hulle nie in die nabye toekoms sal blaas nie,” skryf Bray.

Hy het gesê daar sal langs die kantlyn hard aan albei skeidsregters gewerk word en dat die skeidsregterbase hulle sterkte toewens.

Marks is volgens ’n skeidsregterbaas net nie op dié een wedstryd beoordeel nie, maar op sy vertonings in die reeks.

Legoete was vanjaar in die Super14-reeks nog net 120 minute in beheer as ’n skeidsregter.

Hy is as ’n plaasvervanger-skeidsregter in die tweede helfte van die wedstryd tussen die Sharks en die Cheetahs opgestuur nadat Jonathan Kaplan ná rustyd weens ’n ongesteldheid nie kon voortgaan nie.

Legoete was ook die skeidsregter in die wedstryd tussen die Cheetahs en die Highlanders in Bloemfontein.

Legoete het volgens die Suid-Afrikaanse Rugbyunie (Saru), se skeidsregtersbaas, André Watson, die vermoë om weer op Super14-vlak te blaas.

“Heel anders as Marks, het Pro nie veel ondervinding nie, terwyl Marks reeds ongeveer tien keer geblaas het.

“Ons glo Pro kan dit maak, maar daar is sekere tegniese dinge wat hy eers op ’n ander vlak moet uitsorteer.”

Watson sê bogenoemde stappe deur die skeidsregterbase kan nie as iets ongewoon beskou word nie.

“Ons doen dit al jare lank. Dis nou eers openlik gesê.”

- Volksblad