Ferreira straks teen Stormers geweeg in Kaap
2012-02-01 22:18
BLOEMFONTEIN. – Die Cheetahs se slot-aanwins, Andries Ferreira, kan Saterdag in Kaapstad teen die Stormers sy groot kans voor die Super-rugbyreeks kry.
Sport24 verneem dat dié voormalige Jong Bokkie die gunsteling is om in sy span se derde oefenstryd van 2012 in die beginspan te wees.
Die 21-jarige Ferreira sal straks een van ’n paar veranderinge aan die Cheetahs-voorspelers wees wat in die oefenwedstryd speel.
Die vaskopstut WP Nel behoort ook weer ná ’n skoueroperasie te speel. Nel kon nog nie verlede naweek in dié sentrale streekspan se eerste oefenstryd teen die Southern Kings oorweeg word nie.
Hoewel die Cheetahs nog nie hul groep vir die Stormers-stryd bekend gemaak het nie, het Ferreira gister in die beginspan geoefen.
Dié boorling van Despatch het hom aan die einde van 2011 se Curriebeker-reeks van die Franse klubspan Biarritz af hier aangesluit. Die afrigtingspan hoop hy kan in ’n hardebaard nr.4-slot ontwikkel.
Hy ding met Francois Uys en George Earl in dié posisie mee.
Ferreira was ’n plaasvervanger teen die Kings en ’n uitblinker vir die Cheetahs in Desember se Versoeningsdag-feesstryd teen die Griffons.
Hy het sy loopbaan by Affies in Pretoria begin. Hy het die Bulle ook op Cravenweek-, o.19-, o.21- en Vodacombeker-vlak verteenwoordig het.
Hy het ook twee jaar lank vir die Suid-Afrikaanse o.20-span uitgedraf.
Die Cheetahs sal met 25 spelers na die Kaap reis.
Volgens Hawies Fourie, agterlyn-afrigter van die Cheetahs, sal dieselfde agterlyn as teen die Kings in die Moederstad speel.
Hy sê ook die meeste van sy plaasvervangers – die skrumskakel Marnus Hugo, losskakel Sias Ebersohn, senter Philip Snyman, vleuel Rayno Benjamin en heelagter Willie le Roux – sal heelwat speelkans kry.
) Die skrumskakel Tewis de Bruyn keer volgens Fourie môre van die Franse klubspan Lyon af terug. De Bruyn het hom in November, gedurende die Cheetahs se voorseisoen, by Lyon aangesluit.
Die breier sê De Bruyn sal in een van die sentrale streekspan se twee spanne die Bulls pak. Die Cheetahs speel op 11 Februarie hul laaste opwarmkragmetings teen twee spanne van die Bulls.
- Volksblad