Div: Ek's die baas

Johannesburg – Die Bok-breier Peter de Villiers het Suid-Afrika duidelik laat verstaan dat hy, en niemand anders nie, in beheer van die nasionale span is.

Na verskeie koerantberigte beweer het dat de Villiers nie in beheer is van die Wêreldkampioene nie, maar dat dit eerder die senior spelers of hulpafrigters is wat die toutjies trek, het hy vinnig gespring om twyfel oor sy leierskap uit die weg te ruim.

Die afrigter het ondersteuners se vrae op SA Rugby se e-pos nuusbrief, Bokzine, beantwoord en nie doekies omgedraai toe hy gevra is, oor wie nou eintlik in beheer is van die Springbokke nie.

“Ek is die afrigter, maar ek luister na spelers wat in byna 100 toetse uitgedraf het en reeds elke trofee kon wen wat daar in rugby te wen is. Ek kan nie onthou dat ons kritiek daaroor verlede jaar ontvang het nie. Ek voel nie bedreig deur hierdie tipe praatjies nie. Ek bedoel, ek was die een wat Frankryk toe gegaan het om John (Smit) terug te bring.

Op vrae oor jong talent en die voorstel dat van die senior spelers se dae dalk getel is, het de Villiers geantwoord dat ervaring ‘n noodsaaklike faktor is wanneer dit by die Wêreldbeker-toernooi kom.

“Francois Louw, Juan de Jongh, Flip van der Merwe is almal jong talent wat ons vanjaar ingebring het,” het de Villiers verduidelik. “Maar die geskiedenis van die Wêreldbeker wys dat dit met ervaring gewen word. Die Bok- en Engelandspanne wat die laaste twee toernooie gewen het, was die mees ervare in dié lande se rugby-geskiedenis.

De Villiers het gesê die heelagter Frans Steyn se skopvoet was steeds deel van die Bokke se planne maar meen dat sy verpligtinge by die Franse klub Racing Metro hom weerhou om vir sy land te speel.

- Sport24