Brad een van SA trio teen Skotte
2012-02-02 22:20
- Artikelopsies
- Deel
- Kry Volksblad op
BAGSHOT. – Brad Barritt, ’n voormalige senter van die Haaie en die Opkomende Springbokke, maak môre sy buiging vir Engeland se rugbyspan in die Rose se eerste Sesnasies-wedstryd van die jaar – teen Skotland in Edinburg.
Barritt (25) het Suid-Afrika in 2008 verlaat nadat die Haaie die Curriebeker gewen het om vir Saracens te gaan speel.
Hy kwalifiseer danksy sy grootouers en ouers se herkoms om vir Engeland te speel.
Sy een Saracens-spanmaat, die 20-jarige Owen Farrell, is sy sentermaat. Hulle is die eerste senterpaar sonder toetservaring wat sedert 2002 vir Engeland speel en dít is iets wat die Engelse laas in 1969 in dié reeks gewaag het.
Engeland se tussentydse afrigter, Stuart Lancaster, het nog ’n Suid-Afrikaner van Saracens, die slot Mouritz Botha, in die beginspan gekies.
Botha het nog net een toets vir die Engelse gespeel.
Lancaster het die groentjie-agtsteman, Phil Dowson, ook ingesluit en het ’n onervare span gekies. Hy beoog om die span te herbou ná die skandes van 2011 se Wêreldbeker-toernooi.
Nog ’n Saracens-speler, die losskakel Charlie Hodgson, is terug en gaan die mees ervare speler in die beginspan met 36 toetse wees.
’n Ander Suid-Afrikaner van geboorte, die stut Matt Stevens, is ’n Engelse plaasvervanger.
Altesame sewe lede van die beginspan durf die wedstryd aan met minder as tien toetse op hul kerfstok, met die Harlequins-flank Chris Robshaw wat die span in sy tweede toets lei.
Skotland se beginspan het in 501 toetse gespeel, teenoor Engeland se 236.
)Die Engelse span is:Ben Foden, Chris Ashton, Brad Barritt, Owen Farrell, David Strettle, Charlie Hodgson, Ben Youngs, Phil Dowson, Chris Robshaw (k), Tom Croft, Tom Palmer, Mouritz Botha, Dan Cole, Dylan Hartley, Alex Corbisiero. PLAASVERVANGERS: Rob Webber, Matt Stevens, Geoff Parling, Ben Morgan, Lee Dickson, Jordan Turner-Hall, Mike Brown.
)Die oud-Griekwas-skrumskakel Tobie Botes (27) kan môre sy toetsbuiging maak nadat hy as plaasvervanger vir Italië vir die wedstryd teen Frankryk gekies is.
- Sapa - AFP