Blitse soet én suur
2012-02-03 21:55
PRETORIA, – Die plan was om te bly fokus op hul eie spel en doelwitte en hulle nie te steur aan die eksterne faktore in die Westpac-stadion nie, of dat hulle (al weer) teen Fidji in die kwarteindstryd moes speel nie.
Só het die Blitsbokke se afrigter, Paul Treu, laat blyk nadat sy sewesspan gister se eerste dag van die Internasionale Rugbyraad se Wellington-toernooi in Nieu-Seeland met kliniese oorwinnings afgesluit het.
Suid-Afrika het met seges oor die VSA (21-0), Cook-eilande (43-0) en Engeland (14-10) as wenner van Groep B geëindig.
Dit het die span vanoggend vroeg (Suid-Afrikaanse tyd) met Fidji laat kragte meet.
Fidji was tweede in Groep C nadat Tonga hom vroeër verrassend met 17-14 verslaan het.
Dit was ’n rowwe dag op en van die veld af, met ’n toeskouer wat tydens die laaste wedstryd van die dag, tussen Nieu-Seeland en Samoa, op die veld verskyn en ’n Samoaanse speler geduik het.
Dié kêrel is een van agt toeskouers wat in hegtenis geneem is. Daar is ook 28 van die 31500 toeskouers uit die stadion geskop, glo ’n verbetering op verlede jaar se syfers.
Treu sal ook hoop die Blitse vaar beter as verlede jaar toe Australië hulle in die kwarteindronde uitgeskakel het.
Die Blitsbokke was soos gewoonlik op dag een, soet en suur. Hulle het puik sewesrugby in hul eerste twee wedstryde gespeel, met veral Steven Hunt wat gedy het in die ruimte wat sy spanmaats vir hom geskep het.
Teen Engeland het die span weer in sy ou taktiek van stampkar-sewes verval en eers nadat Branco du Preez met ’n paar hinkstappe vorendag gekom het, is die Engelse geknak.
Die feit dat Cecil Afrika en Kyle Brown ruskans gegee is teen Engeland, het dalk tot dié speelstyl bygedra.
Dit was straks ook ’n goeie sielkundige salvo deur Treu, wat sy twee beste spelers doelbewus laat rus het en steeds die Engelse kon troef.
“Hulle was ’n bietjie styf en seer,” het Treu verduidelik.
In die ander kwarteindstryde het Nieu-Seeland teen Frankryk, Engeland teen Tonga en Samoa teen Kanada gespeel.
Die wenner van die stryd tussen Suid-Afrika en Fidji, kom vanoggend om 08:00 in die halfeindronde teen die wenner van Kanada en Samoa se kragmeting te staan.
Kanada en Tonga het die grootste verrassings gelewer deur tot die laaste agt deur te dring, met ander spanne soos Australië, Wallis en Skotland wat teleurgestel het.
TV: Alle wedstryde van 02:00 tot 11:30 regstreeks op SS 1 en GDN.
- Volksblad