Swanepoel kolf plek oop in span
2012-01-31 22:01
BLOEMFONTEIN. – Die Knights-keurders het weer gewys hulle beloon goeie spelpeil deur Aubrey Swanepoel te herroep vir hul SuperSport-krieketstryd van môre af in Kaapstad teen die Cape Cobras.
Swanepoel het verlede week in Kimberley in Griekwaland-Wes se driedagwedstryd teen KwaZulu-Natal sy vierde honderdtal van die provinsiale kompetisie gemoker.
Hy is met 721 lopies, teen gemiddeld 72.10 per beurt, die top-kolwer in dié kompetisie en ook ’n rede waarom Griekwas die voorlopers daarin is.
Swanepoel is gekies in die plek van Ryan Bailey wat 1 en 0 in die Knights se vorige wedstryd teen die Lions aangeteken het.
Die veelsydige Swanepoel is ’n baie bruikbare draaibalbouler, wat beteken dat die Knights nou met drie draaiers vir hul belangrike wedstryd Nuweland toe opruk.
Werner Coetsee is vroeër ook vir sy uithalerspel vir Griekwas beloon.
Hy het toe nie teleurgestel in sy eerste SuperSport-wedstryd teen sy voormalige spanmaats nie. Sy onoorwonne 78 op nommer agt teen die Lions was een van die redes waarom hulle ’n eerstebeurt-voorsprong gehad het en hy sal na dese sesde kolf.
Die Johannesburgse weer het spel in die vorige wedstryd telkens ontwrig, wat ’n geweldige knou vir die Knights in die pylvak van die SuperSport-reeks was.
Die Lions het 83/5 in hul tweede beurt op soek na 323 gehad toe spel op die laaste dag kort voor die teepouse afgelas is.
“Hulle sou nie sommer die lopies kry nie en was teen die planke wat dit betref,” sê Sarel Cilliers, breier van die Knights.
“Ons het baie goed geboul in hul tweede beurt.
“Ons sou met die paaltjie van Neil McKenzie (27*) of Thami Tsolekile (1*) ’n goeie kans gehad het om te wen.
“Dis jammer oor die weer; dis ’n deel van die spel waaraan jy niks kan doen nie.”
)Die Knights is met drie punte gestraf vir slakkepas-boulwerk in hul vorige wedstryd teen die Cape Cobras in Kimberley.
Hulle is steeds derde met 89.60 punte.
Die Titans 102.82 en Cobras 101.42 is die voorlopers met nog twee wedstryde oor.
- Volksblad