Neil wik en weeg nog
2010-03-09 22:51
- Artikelopsies
- Deel
- Kry Volksblad op
KAAPSTAD - Hoewel die Cape Cobras steeds die gunstelinge is om vanjaar se SuperSport-reeks te wen, het dié krieketspan klaar begin bou aan sy span vir volgende seisoen.
Die Kaapse span het reeds twee nuwe spelers vir volgende seisoen aangeskaf en is glo naby daaraan om nog ’n groot vis, Neil McKenzie van die Highveld Lions, in te katrol.
Die Cobras het die dienste van een van sy senior kolwers verloor met Henry Davids wat sy loopbaan by die Titans gaan voortsit.
Die Cobras het reeds die Lions se belowende jong paaltjiewagter Dane Vilas (24) se dienste vir die volgende twee seisoene bekom, terwyl Johann Louw al Vrydag vir die Cobras gaan speel in ’n vriendskaplike wedstryd teen die Engelse graafskap Hampshire.
Louw (30) is vroeër die seisoen deur die Dolphins die trekpas gegee toe hulle besluit het om op hul jong spelers vir die toekoms te konsentreer.
McKenzie, wat vroeër die seisoen as die Lions se kaptein, in die pad gesteek is, wik en weeg glo nog of hy die Cobras se aanbod van ’n tweejaar-kontrak wil aanvaar.
Die voormalige aanvangskolwer van die Proteas het reeds ’n woning in die Kaap.
- Volksblad