Kiwi’s lek lippe af vir SA ná hul Zim verniel
2012-01-30 21:44
- Artikelopsies
- Deel
- Kry Volksblad op
NAPIER. – Die Nieu-Seelandse boulers lek hul lippe af vir die stryd teen Suid-Afrika nadat hulle Zimbabwe hier aan flarde geboul het.
Die Black Caps het in die kriekettoets op McLean Park 495/7 aangeteken waarna die toerspan vir net 51 en 143 uitgehaal is.
Veral Chris Martin het rede om breëbors te wees ná die Kiwi’s se rekordsege. Hulle het met ’n beurt en 301 lopies gewen. Dié toetsspesialis is vir sy wedstrydontleding van 8/31 (2/5 en 6/26) as die Speler van die Wedstryd aangewys.
Sy ontleding van 6/26 in Zimbabwe se opvolgbeurt was dié veteraan se beste tot nog toe.
Die einste Martin het met Suid-Afrika se vorige toer Gary Kirsten se 100ste toets met sy goeie swaaiboulwerk bederf.
Hy het 11 paaltjies in die tweede toets teen Suid-Afrika ingeoes. Die Kiwi’s het met 9 paaltjies op Eden Park in Auckland geseëvier en dié naatbouler se 18 paaltjies was die meeste in 2004 se toetsreeks.
Die Proteas se toer begin op 17 Februarie vanjaar met drie blits- en drie kitswedstryde waarna die eerste van drie toetse op 7 Maart in Dunedin, op die universiteitsveld, begin.
Martin glo hulle is op koers hoewel Jacques Kallis en sy mede-kolwers nie sommer hul paaltjies op ’n skinkbord sal prysgee nie. “Ons het met die laaste twee toetse gewys ons kan (meeding). En ons kan nog beter word,” het Martin ná die toets teen Zimbabwe gesê.
Volgens hom het hulle het die spreekwoordelike vierde paaltjie aan die wegkant goed aangeval en dat die glipveldwerkers hulle uitstekend van hul taak gekwyt het. “Ek dink nie ek het al ’n beter vangskoot gesien as dié een van Dean Brownlie waarmee hy van Regis Chakabva ontslae geraak het nie.”
Altesaam 13 van die 20 paaltjies was te danke aan vangskote agter die paaltjies. Brownlie het 5 daarvan benut.
Doug Bracewell, wat nege paaltjies in die toets in Hobart teen die Aussies platgetrek het, het weer sy kant gebring met vyf paaltjies. Suid-Afrika sal ook met Trent Boult en Tim Southee, asook die ervare draaier Dan Vettori te doen kry.
Martin, wat sy 37ste verjaardag met die geskiedkundige wegsege oor die Aussies gevier het, praat nog nie van uittree nie. Hy het met sy agt paaltjies teen Zimbabwe Chris Cairns se 218 toetsslagoffers geëwenaar. – Fairfax NZ News, Sportredaksie
- Volksblad