Johan kan steeds in IPL speel

BLOEMFONTEIN - Die Diamond Eagles se Johan van der Wath kan hom binnekort aansluit by die “rebelle” wat ná die opskorting van hul kontrakte met die Indiese Krieketliga (ICL) intussen kontrakte met die Indiese Premierliga (IPL) gesluit het.

Van der Wath, wat in die Proteas se vergrote groep vir die komende Twintig20-Wêreldbekertoernooi op die Wes-Indiese Eilande is, kan betrek word by die skatryk Indiese Premierliga (IPL).

Hoewel dié voormalige Proteas-naatbouler nie met die IPL-veiling in Ja­nuarie ’n bod op hom kon verenig nie, is daar ’n moontlikheid dat hy vanweë beserings ook gekontrakteer gaan word.

Die derde weergawe van dié blitstoernooi begin Vrydag.

Die 32-jarige Van der Wath kan in die plek van die beseerde Kiwi Jacob Oram vir die Chennai Super Kings gaan speel.

Nog ’n Suid-Afrikaner, Justin Kemp, speel ook vir dié span.

Kemp en die Nieu-Seelander Shane Bond (Kolkata Knight Riders) speel vanjaar in die IPL nadat hulle vir die Hyderabad Heroes en die Delhi Giants in die ICL gespeel het.

Van der Wath het ná die opskorting van sy ICL-kontrak met die Mumbai Champs die afgelope seisoen weer vir die Eagles gespeel.

Hy gaan ook nie na Northamptonshire terugkeer nie. Van der Wath sê meer as een van die IPL-spanne kyk in sy rigting en hy verwag om binnekort van hulle te hoor.

Die Eagles moet reeds in hul oorblywende twee SuperSport-wedstryde sonder Dillon du Preez en Ryan McLaren klaarkom.

Hulle is reeds in Indië waar hulle onderskeidelik vir die Bangalore Royal Challengers en Mumbai Indians in die IPL speel.

Ná die onlangse reekse tussen Suid-Afrika en Indië, sal Indië se boulkonsultant, Eric Simons, en die Proteas se Wayne Parnell nou ’n kleedkamer deel.

Simons is die Delhi Daredevils se nuwe hulpafrigter en Parnell speel vanjaar vir dié franchise in die IPL.
 

- Volksblad