Engelse glips laat SA glimlag
2012-01-29 21:31
- Artikelopsies
- Deel
- Kry Volksblad op
JOHANNESBURG. – Die Suid-Afrikaanse krieketspan is binne bereik van die nommereen-plek op die wêreldtoetsranglys ná Engeland se skoknederlaag in die tweede toets teen Pakistan in Aboe Dhabi.
Die Engelse is eergister vir ’n rekord-lae 72 uitgeknikker op soek na ’n karige wenteiken van 145 nadat hulle hul laaste 5 paaltjies vir net 4 lopies verloor het.
Dié glips het boonop aan die Engelse hul eerste reeksnederlaag sedert 2009 besorg nadat hulle ook die eerste toets in Doebai teen alle verwagtinge in met 10 paaltjies verloor het.
Die Pakistanse draaiers Saeed Ajmal (3/22) en Abdur Rehman (6/25) het saam nege van die kolwers laat terugstap, met nét Andrew Strauss (32) en Matt Prior (18) wat dubbelsyfers kon behaal.
Dié telling is die besoekers se swakste tot nog toe teen Pakistan en net die tweede keer in die geskiedenis dat Engeland nie by ’n teiken van minder as 150 kon uitkom nie.
Sou die Engelse segeloos bly in die laaste toets, wat Vrydag in Doebai begin, en die Proteas maak met 3-0 skoonskip in hul komende reeks teen Nieu-Seeland, sal Graeme Smith se span die Engelse op die Internasionale Krieketraad (IKR) se amptelike toetsranglys onttroon.
“Dis moeilik om te dink aan ’n pynliker nederlaag in my loopbaan,” het Strauss, die Engelse kaptein, gister aan cricinfo.com gesê.
“Ons het feitlik álles reg gedoen, maar kon nie die laaste spyker in hul (Pakistan se) doodskis kap nie.”
Volgens hom was dié Engeland se “beste kans in baie jare” om ’n sege op die subkontinent te behaal – iets wat dié span reeds vir meer as ’n dekade lank ontwyk.
- Volksblad