Pitso vaar uit oor les

Nelspruit - Die Suid-Afrikaanse sokkerspan het duidelik nog nie sy Wêreldbeker-les geleer nie.

Só het sy afrigter, Pitso Mosimane, gesê nadat Bafana Bafana Saterdag in ’n stampvol Mbombela-stadion hier ’n oortuigende – dog teleurstellende – sege van 2-0 oor Niger behaal het.

Die Suid-Afrikaners was weliswaar nooit onder enige druk teen dié Wes-Afrikane nie, tog moes hulle heelwat meer doele as dié van Katlego Mphela en Bernard Parker aangeteken het.

“Ek is tevrede met die uitslag, maar terselfdertyd gefrustreerd dat ons soveel maklike doelkanse verbrou het,” het Mosimane ná dié kwalifiserende wedstryd vir die Afrikabeker-toernooi gesê.

“Die telling was nie ’n ware weerspieëling van die wedstryd nie en ons moes minstens dubbeld soveel doele aangeteken het.”

Mphela, Parker, Siphiwe Tshabalala, Steven Pienaar én Kermit Erasmus kon maklik die agterkant van doelnet gevind het in ’n tweede helfte waarin die tuisspan die Niger-doelwagter, Daouda Kassali, behoorlik laat bontstaan het.

Volgens Mosimane was die vrot afronding aan senuwees en ’n gebrek aan ervaring toe te skryf.

Ironies genoeg het Mphela en Parker waarskynlik Bafana se twee moeilikste doelkanse benut.

“Ons het die afgelope week vreeslik hard gewerk aan ons afronding, tog is dit kommerwekkend dat ons nie die stewel kon inlê nie,” het die breier gesê.

“Ek kan seker nie te veel kla nie, want ons het hope kanse geskep teen ’n span wat daarop uit was om ons aanvalle te bederf en drie ligapunte gekry.”

Daar was boonop heelparty ligpunte, meen Mosimane.

Pienaar en MacBeth Sibaya se balverspreiding in die middelveld was uitstekend, terwyl die tuisspan min moeite gehad het om die besoekers se gevreesde doelskieter Moussa Mazzou hok te slaan.

Die waagstuk – om Bafana se wye verdedigers, Anele Ngcongca en Tsepo Masilela, deurgaans vorentoe te dwing – het boonop ook vrugte afgewerp.

Volgens Mosimane wag ’n opdraande stryd op sy span, wanneer hy aanstaande maand na Sierra Leone reis vir die tweede kwalifiserende wedstryd vir 2012 se Afrikabeker-toernooi.

Net die wenner van die groep, waarin Egipte ook wag, is verseker van ’n plek tussen Afrika se uitsoekspanne in Ekwatoriaal-Guinee en Gaboen.

“Ek het regtig gehoop dat ons ons les geleer het ná die Wêreldbeker-toernooi. Toe het ons het ewe veel punte gehad as Mexiko, maar nie tot die tweede ronde deurgedring nie weens ’n swakker doeleverskil,” het Mosimane gesê.

“Hopelik kan ons gemaklik bo-aan die groep eindig en hoef ons nie weer dié pad te stap nie.”

Die besoekende afrigter, Harowna Doulla, was ’n tevrede man.

“Ons het hierheen gekom om dinge moeilik te maak vir Suid-Afrika en ons het geslaag daarin,” het hy aan Sapa gesê.

“Die feit dat ons net twee doele afgestaan het, ondanks die hoeveelheid besit wat hulle gehad het, is ’n pluimpie vir ons verdediging.”

- Die Burger