Koos Doep is sy inspirasie

2012-01-31 22:01

PRETORIA. – Burger Lambrechts se passie vir die Olimpiese Spele is so groot dat hy een van Koos du Plessis se treffers omskryf het in ’n ode om hom te motiveer om nog een laaste keer vir die Spele te probeer kwalifiseer.

Die 39-jarige voormalige Statebondspele-kampioen en die huidige Afrika-kampioen het Du Plessis se Skielik is jy vry grappenderwys aangepas om te beklemtoon dat ’n gooier se vreugde in die sport self moet lê.

“Ons gooiers moet nooit deelneem net omdat ons hoop iemand maak dalk ’n ophef van ons nie.

“Die werklikheid is dat hardlopers altyd meer aandag as ons lelike, vet ouens sal kry,” spot hy.

Sy verwerking van Du Plessis se treffer lui soos volg:

As niemand van jou hoor nie, as niemand van jou weet nie...

Dan ken hul nie jou sport, weet nie wie gooiers heet nie.

Maar dis tog so eenvoudig, jy slaan net op en deur; en die groter afstand sal vanself gebeur;

Die nuus moet jou nie traak nie, net die groot gooi bly;

Die koerant maak tog nie saak nie, die afstand maak jou vry.

Lambrechts erken ruiterlik dat dit ’n grootse poging van sy ou lyf sal verg om ’n derde keer te kwalifiseer om Suid-Afrika op ’n Spele te verteenwoordig.

“In my oefensessies stoot ek 19m. Dit is 1,50m kort van die Olimpiese kwalifiserende A-vereiste, maar ek gaan my alles gee.

“Net dalk kry ek dit tog reg.”

Lambrechts beantwoord die vraag oor waarom hy hom vir oulaas so wil straf met twee woorde: Olimpiese Spele.

“Vir my is daar waarskynlik geen groter simbool van die menslike strewe na uitnemendheid as die Spele nie.

“Dit is die verhoog waarop atlete die kans kry om jare se toewyding en opofferings in ’n kunsvorm om te skep.

“Ek het ná skool die geleentheid gehad om ernstig te begin rugby speel, maar ek het atletiek gekies en ek is nie vir ’n oomblik spyt nie.

“Atletiek is baie regverdiger wanneer dit by die kies van spanne kom.

“’n Rugbyspeler wat 39 jaar oud is, het geen kans om vir die Springbokke uit te draf nie, al is hy die beste speler in sy posisie.

“My enigste keurder as ’n ou atleet is die maatband wat nie lieg nie en nie ’n duit omgee wanneer ek gebore is nie.”

Lambrechts wys daarop dat die Olimpiese kwalifiserende A-vereiste erg straf is.

“Wat dit veral moeilik maak, is die feit dat Saskok vereis dat enige atleet wat aan die Spele wil deelneem, minstens twee keer die kwalifiserende vereiste moet oortref.

“Dit is interessant om daarop te let dat ’n afstand van 20,50m in die gewigstoot op 2009 en 2011 se Wêreldbyeenkomste goed genoeg vir ’n agtste plek in die eindronde was.”

- Volksblad