Hardus én Sunette red SA se aansien

Pretoria - Hardus Pienaar het Sondagaand in Split, Kroasië, op die Wêreldbeker-byeenkoms die eerste keer in twee jaar weer sy spies verder as 80 m deur die lug laat vlieg.

Pienaar se gooi van 83.17 m was goed genoeg vir die tweede plek en is een van die beste afstande tot nog toe deur ’n Suid-Afrikaanse atleet.

Andreas Thorkildsen van Noorweë het met ’n gooi van 89.26 m gewen.

Sunette Viljoen het die enigste ander hoogtepunt uit ’n Suid-Afrikaanse oogpunt gesorg toe sy tweede in die spiesgooi vir vroue met ’n afstand van 62.21 m geëindig het.

Maria Abakumova van Rusland was die wenner met ’n baie goeie afstand van 68.14 m.

Volgens Viljoen se ma het haar dogter se vastrapvoet haar weer opgekeil.

Ondanks die pyn wat sy moes verduur, was Viljoen die bestendigheid vanself.

Haar eerste gooi was 60.48 m, daarna 62.21 m, 59.98 m en 60.07 m.

Ná die byeenkoms, toe sy haar skoen uittrek, was haar voet met bloed besmeer.

Khotso Mokoena is steeds beseer en het nie deelgeneem nie.

Estie Wittstock was gisteraand sewende in die 200 m in 24.05 s en Victor Hogan was agtste in die diskusgooi met ’n afstand van 54.86 m.

Die Suid-Afrikaners wat Saterdag in aksie was, het soos volg gevaar: LJ van Zyl (5de in 400-hekkies – 49.97 s); Burger Lambrechts (6de in gewigstoot – 18.81 m), Chris Harmse (7de in die hamergooi – 71.06 m); SA 4x100-aflosspan (laaste – 39.82 s) en Elizna Naudé (7de in diskusgooi – 55.79 m).

- Sport24.