Daly laat weer sy stokke praat

JOHANNESBURG. – Gholf se grootste stoute seun, John Daly, het die horlosie gister in Doha teruggedraai en die eerste ronde van die Katar-meesterstoernooi een hou agter die voorloper afgesluit.

Daly – wat agt jaar laas ’n toernooi gewen het en meer in die nuus was vir sy egskeidings of sy gewoonte om in die middel van ’n rondte die handdoek in te gooi – het gister ’n foutlose 67 (vyf houe minder as die baansyfer) aangeteken.

Hy is net een hou agter die Spanjaard Gonzalo Fernandez-Castaño.

Daly was lank die klubhuis-voorloper, ná ’n oggend waar die wind die spelers heelwat frustreer het.

“Dis een van die beste rondtes wat ek nog ooit in sulke wind gespeel het,” het Daly aan die Europese reeks se media-afdeling gesê.

“Jy voel of jy vreeslik baie sand eet – dit was brutaal. Ek is eintlik nogal geskok oor my vertoning.

“Ek was vyf en ’n halwe weke af en het nie veel aan my gholfstokke geraak nie.”

Dié 45-jarige Amerikaner se rondte het vyf voëltjies ingesluit. Sy bofhoue was klokslag verder as 300 meter en hy het net drie keer nie die skoonveld gehaal nie.

Hy het ook net drie keer nie die setperk in regulasie-houe bereik nie. Daarby het hy 28 keer geset.

Fernandez-Castaño het in selfs taaier toestande as Daly gespeel, midde-in ’n woestynstorm, maar het geweier om hom daardeur te laat onderkry.

Sy rondte het ’n merkwaardige nege voëltjies (afgewissel met drie brouhoue) ingesluit, waaronder voëltjies op vier van die laaste vyf putjies.

Die Rustenburger, James Kingston en die Pretorianer George Coetzee, het die beste van die Suid-Afrikaners gevaar met rondtes van 70.

Hy het hopelik die swak peil wat hom in die Suid-Afrikaanse somer drie uit vier afsnypunte laat misloop het, nou afgeskud.

Jaco van Zyl is ’n verdere hou terug en Retief Goosen, wat vyf jaar gelede in Katar sy laaste Europese titel gewen het, het ’n 73 (+1) op sy telkaart ingevul.

- Volksblad