Ali-afrigter gooi die handdoek in
2012-02-02 22:33
- Artikelopsies
- Deel
- Kry Volksblad op
PORT ELIZABETH. – Party mense het Angelo Dundee as ’n skelm uitvaagsel beskou, terwyl daar ander was wat gereken het hy is die beste boks-afrigter wat daar tot nog toe was.
Een ding is seker: Dundee se dood gister het nie ongesiens verbygegaan nie. Sy legendariese status het saam met dié van Muhammad Ali gegroei.
Dundee (90) – wie se van eers Merena was – is by sy woning in Tampa, Florida, dood nadat sy liggaam basies ingegee het.
Verlede week was hy in die hospitaal om vir ’n bloedklont behandel te word.
Hy is huis toe, maar gister het hy gesukkel om asem te haal. Hy het omring deur familie gesterf.
“Hy het alles gedoen wat hy wou doen,” het sy seun Jimmy in ’n nuusverklaring gesê.
Een van dié dinge was glo om Ali se 70ste verjaarsdagvieringe verlede maand in Louisville, Kentucky, by te woon.
Die verhouding tussen Ali en Dundee was besonder heg, al het Ali gesê hy het nie regtig iemand nodig gehad om hom af te rig nie.
Hy het wel ’n eerlike, intelligente helper gesoek wat hom gedurende gevegte kon vertel of hy op die regte pad was.
Dundee het veel meer as net dít gedoen. Hy het Ali gemotiveer en kortgevat toe dié bokser die handdoek wou ingooi in gevegte teen Sonny Liston en Joe Frazier.
Hy het Ali ’n waardevolle blaaskans gegee deur ’n handskoen te verniel sodat dit eers ondersoek moes word in ’n geveg in 1963 teen die Engelsman Henry Cooper.
Maar Ali was nie die enigste kampioen wat hy geslyp het nie.
Voor Ali was daar Carmen Basilio en ná Ali was daar byvoorbeeld Sugar Ray Leonard. Dundee het altesame 15 kampioene op die regte pad gehelp.
Selfs George Foreman het sy raad gesoek. Dit was in 1992 toe Foreman ’n verstommende terugkeer na die kryt gemaak het.
In 1974 was Dundee in Ali se hoek toe Ali Foreman in Zaïre uitgeslaan het.
Daar is stories dat Dundee voor die tyd met die toue gelol het sodat dit slapper was en Ali met sy “rope-a-dope-taktiek” gehelp het.
Dundee het dit nog altyd ontken en Ali het in sy biografie “The Greatest” vertel hoe ontsteld Dundee oor sy taktiek was.
Dit was te verstane, die afrigter het altyd sy bokser se gesondheid in gedagte gehou.
Dundee is in 1992 in die internasionale boksheldesaal ingelyf.
- Volksblad