Vrolik jou klerekas dié herfs goedkoop op

Madelein Venter

SELFS die grootste modeverslaafdes onder ons is maar alte pynlik bewus van hoeveel geld ons in die water gooi weens duur klere wat nie altyd hou soos hulle moet nie of uit die mode raak.

Maar die feit bly nou maar staan, jou klere vertel ’n baie duidelike (en luide) storie van jou en nie een van ons wil die wêreld met stukkende broekspype, afgetrapte skoene en uitgerekte moue aanpak nie.

Waar is die middeweg dan? Wel, bestee minder geld op klere, sonder om minder klere te koop...

Onmoontlik? Glad nie! Jy moet net weet waar om te snuffel en waar om verby te hou.

Hoewel gehalte belangrik is as dit by die koop van klere kom, is dit nie moontlik om ten duurste vir elke nommertjie in jou kas te betaal nie.

Die meeste van ons het maar ’n effens strammerige begroting, en ons wederhelfte wil net nie aanvaar dat klere byna net so belangrik as kos en elektrisiteit is nie.

Die geheim is om duurder te betaal vir jou basiese kledingstukke (swart broek, denim, snyersbaadjie of twee ens.), en dan elke seisoen jou kas met ’n paar goedkoper nommertjies op te dollie.

Hierdié tyd van die jaar het die meeste winkels ook groot eindseisoen-uitverkopings aan, so vul nou jou klerekas vir ’n appel en ’n ei aan.

Veral vir werk is dit noodsaaklik dat jy altyd netjies lyk, so loer bietjie hier langsaan na ’n paar sakpas-idees vir ’n vars werksklerekas.

Kontak my gerus met enige vrae, voorstelle of kommentaar by mode@volksblad.com.

- Volksblad