Herfs begin nou sy kle(u)re wys

AL voel dit dalk nie op die oomblik so nie, is die herfs om die draai en om nou nog somersklere aan te skaf is geldmors.

Dit is nou die tyd van die jaar om jou kaste reg te pak en te kyk wat jy wil hou en waarvan jy liefs ontslae wil raak.

Identifiseer só die gate in jou klere-arsenaal en vul dit met die jongste modes aan.

Op die Suid-Afrikaanse Modeweek wat verlede jaar in Oktober aangebied is, het veral vier modeneigings vir herfs/winter 2012 na vore getree.

Hierdie neigings is:
Leer maak ’n definitiewe terugkeer hierdie herfs, hoewel dié veelsydige materiaal nooit werklik van die modefront af verdwyn het nie. Leer is egter nie hierdie seisoen beperk tot handsakke en skoene nie, maar maak ook sy opwagting in rompe en, glo dit of nie, broeke.

Blommepatrone blyk net nooit uit die mode te gaan nie. Dit was deur die lente en somer baie gewild en vloei ook nou oor na die herfs en winter, met handsakke, hoede en skoene wat met allerlei blomme bedruk is.

Die tandruitpatroon (die sogenaamde houndstooth) is ’n treffer uit vervloë dae en maak vanjaar weer sy verskyning. Hierdie swart-en-wit patroon word veral op handsakke skoene, serpe en baadjies gesien.

Pers is dié kleur hierdie herfs, so maak seker jou kas pronk met ’n purper nommertjie of twee.

Grys, wit en swart is ook steeds gewild met spatsels ligpers en kersie om bietjie kleur te verleen. Satyn, fluweel en kolle is ook gewild.

Maak dus seker jy tref die oog dié herfs met ’n gewaagde leernommertjie of ietsie in pers...
– Bron: www.hautefashionafrica.com.

)Kontak my gerus met enige vrae, voorstelle of kommentaar by mode@volksblad.com.

- Volksblad