Wie is Die ware Antwoord?

DIE afgelope week se bohaai oor Die Antwoord wat in Amerika opslae maak, het my opnuut oor die Kaapse Zef-rappers se verhoogpersonas laat wonder.

Kyk, Ninja en Yo-Landi Vi$$er het mos Maandag ’n “uitvoering” van een van hul nuwe treffers, I Fink U Freeky, op The Late Show with David Letterman gelewer.

Wat my waarskynlik meer as hul musiek pla, is dat hulle ’n sekere kommin identiteit geskep het, daarmee die wêreld verower en almal dit vir soetkoek opeet.

Glo die media, aanhangers en veral Amerikaners werklik dié twee is arm, vuil en het swaar grootgeword soos hulle voorgee?

Dit het my aan ’n insetsel op Top Billing laat terugdink waar daar by Ninja-hulle se kamstige huis in Mitchells Plain besoek afgelê is.

Terwyl Vi$$er hamburgers maak, vertel sy hoe swaar hulle as kinders gekry het, steeds in dieselfde huis bly en geld nie juis veel verander het nie.

Ek sou begin lag as ek die aanbieder was...

Goed, hulle is inderdaad freaky soos bogenoemde liedjie lui en dalk is dit wat almal gaande het. Lady Gaga het ook gewys hoe vreemder hoe beter en Jack Parow het bevestig dat nie net seks nie, maar zef ook verkoop.

Maar ek kan nie glo daar is diegene wat dink Die Antwoord is regtig kommin nie.

Ninja, of altans Watkin Tudor Jones, het voor dié groep met verskeie ander projekte soos MaxNormal.TV probeer bekend word.

Die uwe was self ’n slag by Kaktus op die Vlaktes op die KKNK waar Jones, toe nog as MaxNormal.TV, deur die gehoor uitgejou is.

Beslis nie suksesvol as jy my vra nie.

Toe begin hy Die Antwoord en nou pryk hy op die nuutste voorblad van die Suid-Afrikaanse weergawe van die musiektydskrif Rolling Stone.

Ninja en Vi$$er, wat al gesê het hulle is nie ’n paartjie is nie, se kamtige sewejarige dogter, Sixteen, word ook die eerste keer bekend gestel.

Jones het al onder meer in ’n onderhoud gesê sy persona as Ninja werk op dieselfde manier as Superman en Clark Kent.

Hy trek glo net nie sy Superman-pak uit nie.

As jy nog nie Vi$$er-hulle se vertoning op The Late Show with David Letterman op die internet gesien het nie, kan jy Dinsdagaand om 23:15 op kanaal 113 op DStv so maak.

Dis nou as jy jouself daaraan wil blootstel.

Gelukkig verskil smaak en hoef ek geen antwoorde by Die Antwoord te kry nie.

- Volksblad