Skone land met sy donker kant
2012-02-03 21:55
- Artikelopsies
- Deel
- Kry Volksblad op
André Damons
SUID-AFRIKA, met al haar wonders, berge en dale, waters en velde. Met al haar groen en blou.
Suid-Afrika, my land. Ons land. So ’n mooi land.
Ons Suid-Afrika met sy verskeidenheid mense, kulture, tale en idees.
Dit is ’n land waar mense saam kuier, saam speel, saam bly. Op rugby-, sokker-, en krieketvelde, op strande, in restaurante en speelgronde. In parke en op wildplase.
Die is ’n land wat aan almal behoort wat daarin bly, werk en leef. Dis ’n land waar almal ewe belangrik is en elkeen saak maak.
Suid-Afrika, so mooi, vriendelik en verblydend. My Suid-Afrika, jou Suid-Afrika. Ons Suid-Afrika?
Dis ’n land waar so ’n groot verskeidenheid mense in liefde saam leef. Of is dit? Is dit so ’n land?
Kyk jy verder en dieper is daar ook ’n donker kant aan dié mooi land. Dit hang soos ’n groot vet kol op ’n spierwit laken. En geen waspoeier of seep kan dit skoon was nie.
In ’n land waar die weer meestal perfek is, waar die natuurskoon mooier as enige skildery is, waar die mooiste sonondergange voorkom en waar die wildplase vol diere is en die see vol visse – is daar net een ding verkeerd: die mens.
As Suid-Afrika ’n land van vrede en liefde was waar almal gelukkig saam bly, werk en kuier, hoekom is daar soveel ontevredenheid? Valsheid, afsonderlikheid en vreemdheid?
Hoekom roei ons mekaar uit? Hoekom moor en verkrag ons mekaar? Hoekom vat ons mense se plase af en vernietig alles waarvoor hulle hard gewerk het?
Hoekom praat ons sleg van mekaar, beledig, kritiseer en verwens mekaar? Beskuldig mekaar? Hoekom bly sommige in paleise en ander in sinkhuise? Hoekom ry hulle in duur motors en die res sit gepak in gevaarlike taxi’s?
Is ons almal nie Suid-Afrikaners nie?
Ons Suid-Afrika is ’n land vol diepe hartseer. Ons boere word vermoor, ons vroue verkrag. Kinders mishandel en verwaarloos. Ons oumense word aangerand.
Ons renosters word uitgeroei, ons geld gesteel en hulpbronne vermors.
Suid-Afrika, land waarin ons menswees vernietig word en ons menslikheid verdwyn.
Suid-Afrika, land wat beheer word deur moordenaars, verkragters en rassiste. Ai, Suid-Afrika.
- Volksblad