HWS as jy VWEI of weer BDD is

2011-10-27 22:36

HIERDIE week moet ons verslae volkie, wat nog tot verhaal probeer kom ná die tragiese heengaan van een van ons groot bondgenote, Kolonel Maarhamoer Kwaadaffi, hoor dat onse president nou vir sy ampswoning nog ’n sauna ook wil inbou en dit op óns rekening!

Altesaam R169 miljoen se stewige verbeterinkies aan Mahlambablopfu (Plek van die Baie Vroue en Vet Beeste).

Gelukkig het die minister van openbare bouvalle’nstokkie daarvoor gesteek. Ja-nee, nou is ’n gewone stort met lekker sterk druk en ’n groot kop ook nie meer goed genoeg vir ons baas nie!

Oor die sauna sê Oom Kas: “Mens sou dink hy sweet genoeg met drie vrouens en al Malema se straatkaperjolle. Hulle kon veel eerder ’n lekker jakoesie vir hom gebou het, dan kan die hele uitgebreide familie water spaar en saam bad.”

Dik Daan sê asof daar nie reeds meer as genoeg geld in die badwater gegooi word nie, sien hy dat die lugmag kastig nie genoeg BBP-vliegtuie het nie en dat van ons arme edeles nou tussen die gepeupel in eersteklas moet vlieg.

“Hoekom slaat hulle nie sommer twee vlieë met een vlug en bou die sauna in die vliegtuig in nie?”wil hy weet.

“Die goedkoopste sauna wat jy kan kry, is in elk geval daai veertig minute wat jou vlug vertraag word nadat jy ingeklim het.”

Ek sien hierdie week dat 70% van ons land se motorbestuurders hul selfone gebruik terwyl hulle praat (ag ek bedoel bestuur).

Hulle sê nie wat die ander 30% doen nie maar sover ek kan sien, skeer hulle, sit “make-up” aan, foeter kinders met rughandveeg-houe terwyl die Deense hond met sy kop by die bestuurder se venster uithang en vir mý blaf omdat ek op my selfoon praat.

Miskien moet Minister Go-slow Ndebele eerder van hierdie 30% werk maak. En die minister moet sommer by die brakke op die bestuurders se skote begin.

Hoe bestuur enige mens met ’n histeriese hond op jou skoot (en dikwels sommer meer as een)?

Geen probleem nie, solank jy net nie op ’n selfoon praat nie.

Ek moet sê, as daar nou ’n ding is wat my senuweeagtig maak, is dit nie ’n ou wat op ’n selfoon praat met ’n hond op sy skoot nie, maar ’n ou van my jare met swak oë wat ’n SMS sonder sy bril probeer lees én die ding dan nog boonop probeer beantwoord ook.

Eisjjh nee, daai maak my bang!

Ons kinders is mos baie vernuftig met die kort selfoonboodskappies met al wat ’n afkorting is waarvan ons grootmense nie kop of stert kan uitmaak nie.

Soos SJL (sien jou later), PMP (pasop my pa) of GG (gaan goed).

Miskien kan hulle vir ons oues ook so op die kar se stuurwiel ’n gids met 22font-grootte letters opplak dat die ouens kan ophou sukkel.

Ons sit dan ons eie afkortings daarop, soos: BDD (by die dokter), BVB (beste vriend se begrafnis), BDR (bring die rolstoel), VWEI (vergeet waar ek is), HWS (het weer sooibrand), PNNKO (pas nie naweek kleinkinders op), BBVG (bring batterye vir gehoorstuk) en so aan.

So iets kan mos baie help om die dood van ons paaie af te hou.

Of wat praat ek als?

Ek moet sê verlede week het ek nog grappies gemaak oor die sensus maar nou is dit nie meer snaaks nie.

Daar is nog net ’n dag of wat oor om in tel te kom en ek het nog nie eers ’n sensus of ’n senbroer of selfs een van daai blinknuwe geel karretjies in my omgewing gesien nie.

En ek praat nie nou van my straat nie, hulle is nie eers náby ons nie!

So wat doen ons nou?

Kan jy iemand bel en sê jy’s nog nie getel nie? Stuur jy rookgranate uit jou agterplaas op? Ry jy rond totdat jy ’n geel karretjie sien en swaai voor hom in? Of ry jy met ’n banier rond wat sê: “Tel my asseblief”?

Oom Kas sê hy wonder ook hoe hulle die ouens in die Uniegebou tel met dié dat onse president hierdie week so lekker ge-“hire” en “fire” het.

En of hulle sal onthou om by die polisiehoofkantoor weer een ou af te trek van hul opgawe.

Neef Bartel sê as hulle dit maklik wou maak, kon hulle maar net gister en vandag lugfoto’s van Malema se stormtroepe geneem het, dit met tien gemaal het en tien miljoen onwettige immigrante en ’n polisiekommissaris afgetrek het.

En siedaar!

- Volksblad