Gifkoppe se uiters geheime, kort klagstaat

OP ons jaarlikse Gifkop-lekkergotla by Dwaalboom het ons die regering se uitnodiging tydens húlle lekkergotla by Bela-Bela aanvaar om sy vertoning die afgelope jaar te beoordeel.

Ons het Maandagoggend ons KPK-verslag (Kort Prestasie Klagstaat) by die Uniegebou afgelewer.

Kortweg: Basiese Onderwys (waardeloos), Landbou ( vrugteloos), Arbeid (werkloos), Kommunikasie (draadloos), Energie (kragteloos), Binnelandse Sake (eindeloos), Jeug (moereloos), SAPS (magteloos), Presidensie (skaamteloos).

Ja, en ons arme piepols natuurlik leiersloos.

En ons inligting uit die binnekringe van die Joef Lieg is dat Juju die Bokke se nuwe bagasiemeester (klein tassies) word want Heimlike Meyer kies net adviseurs uit die noordelike provinsies. Nee, ons verwag nie dat die regering ons verslag gaan publiseer nie, want dis uiters geheim. So geheim dat ons die verslag met Tippex geskryf en met ’n uitveër geteken het.

Ai vriende, net as ons dink niemand kan iets snaakser of meer onnosel uitdink om op ons ou landjie se dik wetboeke te plaas nie, verras een of ander Einstein ons. Nou lees ons van planne om swanger vrouens in drankwinkels te verbied.

Hoe op die liewe aarde hulle dit wil doen, sal net die regsreus wat dit uitgedink het, kan verduidelik.

Oom Kas reken hulle kan dalk as Gauteng se tolhekke finaal sink, dié goed wat soos pers disko-ligte oor ons snelweë troon, by die drankwinkels opsit om die swanger vroutjies daar uit te hou.

Kan iemand dalk vir ons uitvind of ons nog ’n handves van menseregte het, of nie?

Maar ai, die arme drankwinkeleienaars! Hoe gaan hulle weet? Party swanger dametjies is mos so klein dit lyk kompleet of hulle net ’n gholfballetjie saamdra. Wat as ’n poppie van 150kg ingewaggel kom wat lewenslank al swanger lyk? Een van daai’s wat haar “maternity”-rokke se planne by die munisipaliteit laat goedkeur.

Dik Daan vertel juis hoe hy anderdag vir ’n vriendin van sy dogter gevra het wanneer die groot dag dan nou is, net om tot sy skok te hoor dat die kleinding al drie maande oud is. Eishh!

Ná verlede week se vertellinge oor die ooms wat so mooi kon bid, ’n laaste aanhangseltjie.

Ou Willem se pa het dié aand mooi gebid vir die meisie wat Willem die naweek huis toe gebring het. “Liewe Vader, ons het U al baie van Hannie vertel maar ons is diep dankbaar dat U haar vanaand hier om ons tafel uiteindelik self in lewende lywe kan sien.”

- Volksblad