Daai sensor werk dalk net in beboude gebiede

GELUKKIG het iemand daar van bo af ons darem per koerant, mikstok en posduif gewaarsku oor die nuwe jaar se snaakse weerstoestande, want ons mag mos nie meer mekáár waarsku nie.

Jy mag net so skalks loer wanneer jou buurman begin ark bou. Haai siestog, en behalwe dat die arme Lampopo op ’n bankrotveiling verkoop gaan word, spoel hy toe nog weg Maarpoetoe toe!

Nee kyk, toe ek sien die lugmag begin die seekoeie en krokodille ook “airlift”, toe weet ek sommer dis ’n lelike ding!

Neef Bartel vertel van ’n ou wat hy ken wat laasweek ’n erf vir halfprys by Blydepoort gekoop het. Sy enigste moeilikheid is dat die erf nou by Olifantskamp in die Kruger-Willetuin is (maar, soos Oom Kas sê, dit kan mos nie rêrig ’n probleem wees nie).

Intussen het die dieseldampe nog nie gaan lê oor onse president wat met drie vliegtuie afgesit het na die VN toe nie. Hierdie week het hy darem blykbaar weer drie lande met een enkele vliegtuig besoek. Dik Daan reken dis baie onregverdig dat die prez so gekritiseer word, want as hy sy hele familie én skoonfamilie moet saamvat en nog ’n lyfwag of twee, is drie vliegtuie mos nie te veel nie. “Soos dit is, dink ek in elk geval dis hoekom ons baas meer as een vrou het. Die ander is net daar om sy hoofvrou te ‘shadow’ indien sy dalk langs die pad gaan staan. En die grommers en die brommers moet sommer ook ophou grom en brom oor die nuwe vliegdekskip wat die staat nou wil aanskaf. Hulle moet maar net met daai ding in die regte rigting vaar, dan kan die Stinkwazi mos sommer met ’n Ventertjie vol gereedskap in die see of in die Vaaldam land vir herstelwerk, of hoe?”

In ’n week waarin ek beleef het hoe vier (ja vier!) Japanse bakkies en viertrekke helder oordag by ’n begrafnis gesteel is, lees ek dat Japanse wetenskaplikes nou ’n druksensor-oppervlak ontwerp wat mens se boude in jou voertuig kan identifiseer om te keer dat iemand hom steel.

’n Mens wonder net wat maak daai sensor as jy en jou ryding nog die een oomblik soos boude was en jy gaan dan met vakansie en tel so vyf of ses kilo’s op. Gaan hy nog dink julle twee is so dik soos diewe of gaan hy eerder dink jy’s ’n dik dief en begin skree?

Dik Daan, wat maar baie wantrouig oor die ou sakie is, reken daai sensor sal in elk geval waarskynlik net in beboude gebiede werk.

- Volksblad