Skole waar integriteit ’n hoofvak is

VERLEDE Donderdag berig Die Burger Oos-Kaap oor Mary May en haar vriendinne wat pousebroodjies voorsien vir die dunmaagkinders van die Laerskool Tjaart van der Walt in Port Elizabeth.

Duidelik onthou ek September 2010 toe ek gasspreker was by ’n tee wat dié skool aangebied het.

Maande tevore toe hulle my kontak, het ek gesê ek sal dit doen teen ’n afslagfooi, beslis nie gratis nie. Dadelik sê Zelda du Toit, die hoof se vrou, dis reg. Maande later, toe die funksie nader kom, besef ek wáár die skool geleë is.

Armste armes. Nogtans wou ek in my inhaligheid nie die fooi wegwuif nie.

Drie dae voor die funksie kom die gryse van die werk af met ’n wit mandjie.

Hy sê ’n kollega se vrou hou skool by Tjaart van der Walt en die skool stuur die mandjie.

Suspisieus maak ek dit oop. Het al nare stelle afgetrap met gehawende confettimandjies vol junk. Muf biltong, tjoklits vol wit skif wat na motballe smaak.

Dan kry ek nie my fooi nie, want hulle hét mos ’n geskenk gegee. Maar dié wit mandjie is anders.

Toegevou in wit sneespapier is twee kershouers met spieëlteëltjies, gegeurde wit kerse, ’n roetekaart en parkeerpermit. En ’n aangrypende brief van die hoof, meneer Eugene du Toit, om te sê dankie dat ek bereid is om teen ’n afslagfooi op te tree.

Ek tjank en kontak Zelda om te sê ek is uitgeboul deur hul goodwill en weier om ’n fooi te vat. Ons is albei in trane.

Daardie Saterdag beleef ek ’n juweel in die hart van skreiende armoede. Keurigheid en etiket par excellence.

Wat my altyd sal bybly, is die toestand agter die verhooggordyne.

Die spreekwoord sê: bo blink, onder stink. Menige keer het ek al by hoogaangeskrewe plekke opgetree, dan is dit morsig agter die gordyne. Daardie dag aanskou ek die skoonste agterverhoog van my loopbaan.

Van-die-vloer-af-eet-skoon.

Die personeel van Laerskool Tjaart van der Walt verdien ’n kroon. So ook alle arm skole in ons land waar trots nog tel.

Die kinders aldaar is bevoorreg, omdat integriteit ’n hoofvak is. En omdat hulle wáre onderwysers as leermeesters het.

Dankie Eugene en Zelda du Toit. Dankie Mary May.

En dank onse God alom.

- Volksblad