Die ding met Adriaan se sakboekie

DIS verspot-maklik om voortdurend te kla oor die chaos in onse land.

Dis maklik om te sê mense moet hulle jisse oplig en iets dóén. Maar waar begin mens?

My kop sê: by die jeug. Hulle moet die waarde ken van studeer, hard werk. Respek hê vir hul omgewing, meerderes, wette en gesagstrukture. Kanse raaksien en vasgryp.

Maar daardie droom is amper soos om ’n psalm op te gee wat nie bestaan nie.

Tog gebeur daar soms iets wat my hoop laat flikker. Soos die ding met Adriaan.

Laas week bars ons warmwatergeiser. In ’n japtrap is die loodgieter hier om te red wat verlore is. Die geiser is in die dak op die boonste vloer, en om daarby uit te kom, moet ’n opening in die dry wall gesny word.

Twee manne ry om materiaal te kry vir die onbeplande operasie. Die derde, Adriaan, ’n jeugdige bruin man, bly agter.

Omdat dit naby brekfistyd is, soek ek hom om te hoor of hy wil koffie hê.

Ek kry hom waar hy rug teen die buitekant van die tuinmuur in die skadu sit, ’n dik sakboekie op sy skoot. Toe-oë, mompelend. Dadelik dink ek hy’s ge-Tik.

“Adriaan?” Hy maak sy oë oop, sprei sy hande beskermend oor die sakboekie.

“Wat’s fout? Wil jy koffie hê?”

Só sal dit uitkom dat hy in elke aftydjie deur die werksdag besig is om die Koran te leer.

“Ek is baie devoted, Mevrou, ek try my bes...”

Aangeraak gaan haal ek my hardeband naslaan-Koran en sit dit in sy hande.

“Sal jy asseblief my Koran seën, Adriaan?”

Hy druk die boek teen sy maer bors; prewel toe-oë. Vryf oor die groen blad met sy verrinneweerde jongmenshand. Toe weet ek dat ek nie so toegewyd in my geloof is soos hy nie.

Hy het nie daar gaan sit met sy Korantjie om gesien te word nie, maar omdat hy wóú.

’n Devoted jongmens wat sy bes try. Nou wonder ek oor die Koran wat doods op my boekrak staan. Bybels, afgestorwe boeke, stapels tydskrifte. Dis ’n sonde dat ek daaraan klou.

As almal ophou klou en meehelp dat ons jeug léés, synde wat, is ’n goeie wending mos onvermydelik.

Vashou, Adriaan. Jou devotedness sal jou na ’n goeie bestemming lei.

As almal maak soos jy, sal onse land ’n mooi psalm sing.

- Volksblad