Staat hof toe gevat oor grense

DIE regering se beloftes, ooreenkomste en voornemens om die Vrystaatse boere aan die grens met Lesotho te beskerm, het op min uitgeloop.

Gister is berig dat die grensheining wat as deel van ’n ooreenkoms met Vrystaat Landbou (VL) opgerig is, feitlik oornag deur stropers vernietig is.

Dié ooreenkoms is in Junie 2010 deur ’n hofbevel bekragtig, en het ook voorsiening gemaak daarvoor dat die grenspad herstel sal word en dat die polisie die grens sou patrolleer. Uiteindelik sou die weermag op 1 April verlede jaar die patrollies by die polisie oorneem.

Van die grenspad van 487 km is nog net 50 km herstel. Die heining is wel opgerig, maar boere beweer die feit dat die heining nie bewaak word nie, is die rede waarom dit beskadig is. Boere beweer dat daar verlede jaar laas soldate gesien is wat die grens patrolleer.

VL het nou ’n hofaansoek ingedien waarin gevra word dat die regering aan minagting van die hof skuldig bevind word omdat hy sy pligte aan die grens versuim en nie die hofbevel nagekom het nie.

Die integriteit van die grens met Lesotho en die veiligheid van die boere daar is duidelik ’n groot dilemma vir die regering. Ongelukkig word die indruk gewek dat die beveiliging van hierdie gebied nie van wesenlike belang vir die regeerders van die land is nie.

Nietemin is dit ’n groot dilemma, en reeds in November verlede jaar het die staatsdepartemente wat verantwoordelik is vir die beveiliging van Suid-Afrika se landsgrense in die parlement erken hulle kom nie die mas op nie.

Daar is 5000 km se grensdrade in die land wat patrolleer en beskerm moet word, en teen einde verlede jaar was daar nog net 1050 soldate ontplooi om hierdie taak te verrig.

’n Verdere probleem is ’n tekort aan geld om grensdrade te herstel en noodsaaklike toerusting aan te koop om die grense te beveilig. Die nasionale tesourie het reeds aangedui dat die geldkrane toegedraai is weens die heersende ekonomiese toestande.

Gegewe die tempo waarteen geld op bedenklike wyse deur staatsdepartemente verkwis word, sal ’n mens verstaan dat die boere van daardie gebied nie hierdie verskoning sal aanvaar nie.

Die regering se geldmorsery bring mee dat die staat nie sy dure grondwetlike verpligtinge teenoor sy onderdane kan nakom nie.

Dit sal goed wees as die hof die regeerders in die bek ruk hieroor.

- Volksblad