Sake kon anders uitdraai vir held
2012-01-25 22:33
- Artikelopsies
- Deel
- Kry Volksblad op
DIE polisie moet wet en orde handhaaf en ’n veilige omgewing skep, sê die Grondwet.
Op Ladybrand is sers. Moeketsi Motete die naweek man-alleen na ’n grensplaas wat deur drie gewapende mans uit Lesotho betree is en waar ’n plaasaanval gedreig het.
Op die oog af beskou, is Motete ’n held.
Twee van die skurke is danksy hom agter tralies. Die derde het weggekom.
Hieroor kan die vinger nie na Motete gewys word nie. Hy was een polisieman teen drie gewapende skurke.
Motete het ’n vuurwapen by die skurke gekry. Net soos die een waarmee misdadigers uit Lesotho onlangs mnr. Sean Schutte (36) op ’n nabygeleë plaas vermoor en sy broer Louis (33) gewond het.
Kyk ’n mens wyer na dié gebeure die naweek op die plaas De Hart, is dit ’n riller.
Motete is nie man-alleen na die plaas omdat hy ’n Rambo is nie. Weens die voortslepende mannekrag-tekort in die polisie, was daar nie ’n enkele kollega om saam met hom te gaan nie.
Dít nadat die geskorste polisiehoof, genl. Bheki Cele, verlede jaar in die Oos-Vrystaat met groot fanfare ’n nuwe landelike veiligheidsplan aangekondig het met “baie hulpbronne, beter toerusting en voertuie en selfs helikopters, want geen polisielid mag meer doodgaan met ’n vuurwapen in sy of haar hand nie”.
Van dié plan het nog bitter min gekom. Ook nie van talle ander beloftes op die misdaadgeteisterde grens nie.
Dit laat mens ook wonder oor die slagspreuk van die Nasionale Polisiedag: Squeezing crime to zero through Human Capital Investment...
Die kaarte kon die naweek anders geval het vir Motete en die mense wat hy moes beskerm, omdat hy een polisieman teen drie gewapende skurke was.
Nóg ’n polisieman en nóg ’n boer kon gesterf het.
Wat sou die polisie en regering se trooswoorde en verskonings aan nog ’n gebroke familie of families gewees het?
Die Grondwet sê ook die polisie moet alles voorkom wat die veiligheid van mense bedreig.
Maar polisielede se lewe word deur ’n mannekragtekort en leë beloftes bedreig.
En daarmee saam ook die lewe van die mense wat beskerm moet word.
- Volksblad