Magashule en sug na mag

Die drastiese stappe waartoe die Mangaung-metro hom gewend het om Volksblad se poging om kritiese denke onder lesers – én kiesers in die algemeen – op advertensieborde in Bloemfontein aan te moedig, verdien kommentaar.

Op dié bord was ’n grafiese voorstelling van die Vrystaatse premier, mnr. Ace Magashule, se beplande ultraluukse private huis, ’n plakkershut en van vullissakke op straat wat nie verwyder is nie. Die opskrif was Ace-paleis/pondok/varkhok.

Die agentskap wat dié bord opgerig het, moes die bord in opdrag van die Mangaung-metro inderhaas verwyder. Volksblad is ter elfder ure hiervan in kennis gestel.

Volgens die uitvoerende hoof van die advertensie-agentskap Ad Output, me. Sunet Swanepoel, insinueer die metro se regulasies dat die bord “aanstoot gee”. Volksblad het nie ’n enkele klagte hieroor gekry nie.

Dit is skokkend dat die leiers van die provinsie meer bekommerd is oor die premier se beeld as om te verseker dat die provinsiale ratte op geoliede wiele loop.

Dit is algemeen bekend dat die ANC die dryfveer en geldmag agter ’n weeklikse koerant in die provinsie is – om watter ander rede as vir beeldpoetsery?

Volksblad kry baie kritiek uit Magashule se kantoor oor berigte wat hom en sy regering in ’n swak lig stel. Die koerant word voortdurend daarop gewys dat inligting nie korrek is nie.

Maar sedert sy aanstelling as premier het Magashule nog nooit ’n nuuskonferensie gehou waar die media behoorlik ingelig is nie. Hy het twee woordvoerders in sy kantoor, maar steeds is dit ’n missie om sinvolle kommentaar of hulp uit hulle te kry.

Die premier het net voor Kersfees verlede jaar die eerste keer in sy ampstermyn ’n amptelike besoek aan die koerant gebring – om te kla oor berigte wat hom in ’n slegte lig stel.

Ampsbesoeke aan die koerant deur politici is algemeen. Maar dan is dit om gedagtes uit te ruil, nie om klaagliedere te sing nie.

Volksblad is egter verbind tot oop kommunikasie met die Vrystaatse regering. Maar toe deure aan die premier se kant word moeilik oopgeskop.

Wat munisipale regulasies betref, is dit die munisipaliteit se volste reg om advertensieborde te verwyder wat “onwettig” of nie op peil is nie. Maar dan moet dit konsekwent toegepas word. Of dit die geval was met die verwydering van Volksblad se advertensie, is te betwyfel, omdat die advertensie aan die keersy steeds daarin was.

Dit laat Magashule en sy beeldpoetsers se magsbehepte onderrok net verder uithang en wys hoe desperaat hulle is om ’n greep op die media in die provinsie te kry.

- Volksblad