Kollig weer op Zuma en Shaik

DIT wil lyk of pres. Jacob Zuma se verhouding van “wedersyds voordelige simbiose” met die veroordeelde bedrieër mnr. Schabir Shaik hom nog ’n lang tyd gaan agtervolg.

Ofskoon Shaik homself gedistansieer het van ’n berig in ’n Sondagkoerant waarin hy aangehaal word dat hy wil hê Zuma moet ’n lening van R2 miljoen terugbetaal, plaas hierdie berig opnuut die kollig op die verhouding tussen die twee en die wyse waarop Zuma daarby baatgevind het.

Die Sunday Independent beweer ook dat Shaik ’n presidensiële kwytskelding van Zuma wil hê, wat beslis nie verkeerd aangehaal kan wees nie.

Die feit bly staan dat Shaik, finansiële raadgewer van Zuma, in 2005 aan bedrog en korrupsie skuldig bevind is en tot vyftien jaar tronkstraf gevonnis is.

Daardie korrupsie is nie in ’n lugleegte gepleeg nie. Vir Shaik om aan korrupsie skuldig bevind te kon word wat só ernstig is dat dit vyftien jaar tronkstraf regverdig, moes hy ’n korrupte verbintenis met Zuma gehad het.

Soos regter Hillary Squires bevind het: “Aangesien al die beskuldigde maatskappye in een of ander stadium gebruik is om somme geld aan Jacob Zuma te betaal in oortreding van seksie 1(1)(a)(I) of (ii), van die Korrupsiewet en beskuldigde Nommer Een (Shaik) hulle met die doel gerig het of self betalings gedoen het, word al die beskuldigdes skuldig bevind op die hoofaanklag van klagte 1.”

Uiteindelik het ’n merkwaardige stel bandopnames die grondslag gelê vir die Nasionale Vervolgingsgesag (NVG) se bedenklike beslissing om Zuma nie verder te vervolg nie.

Wat met Shaik gebeur het, is algemene kennis. Omdat hy “sterwend” is, is hy op mediese parool vrygelaat.

En met sy een voet in die graf is hy onder meer op ’n gholfbaan betrap, besig om ’n rondetjie gholf te geniet.

Uiteraard werp hierdie hele sage ’n donker skaduwee oor die president, veral oor sy beloftes en voornemens om korrupsie te bestry.

En Shaik, as’t ware herrese uit die graf, het nie verdwyn nie, en hul verhouding gaan steeds by Zuma kom spook, veral in ’n jaar waarin die nuwe leier van die ANC gekies gaan word.

Shaik verwys na Zuma as die “eerbare president – vir wie ek groot respek het”.

Ongelukkig geld die waarheid in Zuma se geval dat ’n mens met sulke vriende nie vyande nodig het nie...

- Volksblad