Goeie, maar ook slegte nuus vir Suid-Afrika

Daar is baie positiewe, maar ongelukkig ook rooi ligte wat flikker in die waarnemings van twee buitelandse toeriste so kort voor die Wêreldbeker-sokker se afskop, waaroor Volksblad gister op sy voorblad berig het.

Mnre. Josh Fowler (28) van New York en Esteban Garro (31) van Mexiko moes 200 km aflê om in Bloemfontein te kom bad omdat ’n waterpomp wat uitgebrand het, veroorsaak het dat Zastron drie dae sonder water gelaat is.

Pompe kan oral uitbrand, maar ongelukkig is water- en rioolprobleme iets wat op te veel plekke in die land voorkom. Weens dinge soos ’n gebrek aan onderhoud en ’n onvermoë om noodsaaklike dienste te lewer.

Dis egter insiggewend en verblydend hoe positief die twee toeriste ondanks die waterprobleem oor Suid-Afrika is.

“Ek is mal oor Suid-Afrika. Ek het dit al selfs oorweeg om aansoek te doen om burgerskap hier.

“Die ruimte, die mense en hoe dit hier lyk, is vir my ’n bekoring,” sê Fowler.

En Garro wie se eerste besoek dit aan Bloemfontein was, sê hy is mal oor die plek. Maar dan dié woorde wat ernstige stof tot nadenke vir Suid-Afrikaners verskaf:

“Ek is net skrikkerig vir die hoë misdaadsyfer.

“Ek het vriende wat nou eers vier dae lank in die land is en reeds twee keer in Johannesburg beroof is.”

Suid-Afrika se potensiaal kan skipbreuk ly weens misdaad. Iets móét gedoen word.

- Volksblad