DA-veranderinge wys pad aan vir andere
2010-09-07 20:41
- Artikelopsies
- Deel
- Kry Volksblad op
Die DA se 22 veranderinge aan sy skadu-kabinet in die parlement het veral ook ’n nuttige les vir die ANC-regering.
Die DA het die veranderinge aangebring ná ’n oorsig van LP’s se prestasie die afgelope sestien maande.
Die boodskap is duidelik: As jy nie presteer nie, word jy gedemoveer.
Nie minder nie as ses skaduministers, wat senior woordvoerders oor bepaalde portefeuljes was, is óf na adjunkwoordvoerder-poste of minder prominente portefeuljes gedemoveer.
Dit maak ook nie saak hoe bekend jy is nie. Die oud-SAUK-omroeper, Niekie van den Berg, is byvoorbeeld van skaduminister van kommunikasie na ’n adjunk in dié portefeulje gepos.
Dié verfrissende vars bries in bestuurstyl, waarby die hele Suid-Afrika kan baat vind, vorm veral ’n skril kontras met hoe die regering dinge doen.
Lojale ANC-kaders en pêlle word ten alle koste beskerm. Maak nie saak hoe onderpresteer word, of sommer plein drooggemaak word nie. Een voorbeeld is pres. Thabo Mbeki en ander ANC-hoës wat die korrupte bedrieër komm. Jackie Selebi in sy pos as polisiehoof teen vervolging probeer beskerm het.
Die spektakel word te dikwels gesien van iemand wat onbevoeg is, wat net weer in ’n ander senior pos ontplooi word – omdat hy of sy goeie “konneksies” met die huidige ANC-leierselite het. Vandaar die baie politieke dooie hout.
Met só ’n benadering kan die DA verwag om deur meer Suid-Afrikaners gesteun te word. Want hulle sal weet dat onderpresteerders nie geduld sal word nie.
- Volksblad