Polisie krap kop oor kaal lyk van vrou in boom
2012-02-21 22:32
Charné Kemp en André Botha
KIMBERLEY. – Die polisie krap steeds kop oor die identiteit van ’n naakte vrou wie se ontbinde lyk die naweek in ’n boom in die rykmansbuurt Belgravia gevind is.
Die lykskouing wat gister voltooi is, toon dat die vrou kaal was ten tyde van haar dood. Die polisie het ’n foto van ’n oorring uitgereik in ’n poging om haar te identifiseer.
Kons. Sergio Kock, polisiewoordvoerder, sê die lyk is Saterdagmiddag omstreeks 16:00 gevind.
“Die lykskouing toon dat sy ’n swart vrou was tussen 25 en 40 jaar oud. Sy was tussen 1,6 en 1,7 meter lank.
“Sy was reeds in ’n gevorderde stadium van ontbinding. Ons kon net ’n oorbel aan die lyk se linkeroor vind. Verskeie forensiese toetse is uitgevoer. Ons wag nog op daardie uitslae.”
Genl.maj. Jean Abrahams, polisiehoof in die stad, sê die polisie werk onverpoos om die raaisel en die moord op te los.
Die ondersoek word gelei deur ervare speurders onder leiding van kol. Avril Wentzel.
Mnr. Donald Munro, langs wie se erf die boom staan waarin die vrou gekry is, sê hy het rondom 6 Februarie agtergekom daar hang ’n sterk reuk in die lug.
’n Paar dae later het hy en sy werker, mnr. Edward Morake, daaroor gepraat en Morake het gesê hy ruik dit ook.
Hulle het gaan kyk en ’n groot kol onder die boom gekry. Dit het gelyk asof iemand bloed daar gestort het. Morake het dit met grond toegegooi.
Hulle het probeer om tussen die takke van die boom te sien, maar die blare was te dig.
Hy het bleikmiddel en water op die kol gegooi.
Saterdag het ’n buurman se werker die lyk in die boom gesien. Die vrou was in ’n sittende posisie heel bo in die boom.
Enigiemand met inligting word gevra om ao. Marcus Mafaro by 079-504-7011 te bel.
) Die ontbinde lyk van ’n Amerikaanse uitruilstudent, mej. Melissa Dietzel (22), is op 12 Januarie in Randwick in Sydney, Australië, ook in ’n boom gekry.
Dit was nadat inwoners in die omgewing van ’n aaklige stank gekla het.
Die lyk was in ’n boom, sowat 10 meter van die grond af. Dietsel was ’n kinderoppasser in die stad. Sy was ’n maand lank vermis voordat haar lyk gevind is.
Dié boom is intussen afgekap.
- Volksblad