NK se fokus verskuif
2012-02-22 22:28
KIMBERLEY. – Altesame R1,761miljard gaan in die komende geldjaar aan die ontwikkeling van padinfrastruktuur in die Noord-Kaap bestee word.
Die fokus verskuif van padbou na die onderhoud van paaie om die bates te bewaar wat nou bestaan, het me. Grizelda Cjiekella, waarnemende premier, gister in haar provinsiale rede gesê.
In ’n toespraak waarin min gesê is oor nuwe projekte, het Cjiekella gesê die doelwit vir die nuwe geldjaar is die skep van 25705 werksgeleenthede. Die teikens vir die aangewese groepe is 55% vroue, 40% jeug en 2% mense met gestremdhede.
Ses groot programme vir maatskaplike verantwoordelikheid word deur die provinsiale regering gefinansier.
Hiervan is vyf die opknapping van provinsiale natuurreservate.
Die Goegap-natuurreservaat word teen ’n koste van R47,7miljoen opgeknap met 391 werkers betrokke, die Rolfontein-reservaat teen R18,7miljoen met 228 werkers, die Oorlogskloof-natuurreservaat teen R22,6miljoen met 130 werkers, die Doornkloof-reservaat teen R48,2miljoen (werkers moet nog aangestel word), en die Witsand-reservaat teen R38,2miljoen met 200 werkers.
Groot vordering is die afgelope jaar gemaak met die aankoop van grond vir voorheen benadeelde individue. Meer as 100000 ha landbougrond is beskikbaar gestel en sal aan individue wat kwalifiseer, oorgedra word.
Daar sal voortgegaan word om bevoordeeldes van grondhervorming te ondersteun.
Groter steun sal aan munisipaliteite gegee word vir die administrasie van munisipale landbougrond om te verseker dat dié grond aan kleinboere beskikbaar gestel word.
- Volksblad