Brug dalk dié week herstel
2012-02-21 22:26
KAKAMAS. – Dié dorp se mense laat hulle nie onderkry deur die verkeersbrug op die dorp wat gesluit is nie
’n Romantiese prokureur van die dorp het selfs ’n Valentynsdagete vir sy vrou op die brug gereël.
Die verkeersbrug is sedert 9 Februarie vir verkeer gesluit nadat ’n pilaar, waarop ’n balk rus, gekraak het. Die brug het met 75cm gesak.
Die ingenieursfirma Botes & Kennedy Monyane is tans aan die spook om die brug te herstel.
Die ingenieurs sê hulle installeer ’n tydelike struktuur van vier staalpilare, vier drabalke bo die ryoppervlak en twee drabalke onder die ryoppervlak van die brug. Hierdie struktuur sal die brug lig en in plek hou sodat die beskadigde dralaers vervang kan word.
Sodra die struktuur gereed is, kan die brug weer oopgestel word vir verkeer in een baan. Die hoop is dat die brug teen Donderdag of Vrydag weer oop sal wees.
Die skade aan die brug is vermoedelik veroorsaak deur ’n sogenaamde aardskuddingswerm wat sedert 2010 in die gebied voorgekom het. Die swaarste trilling van ’n reeks trillings was op 18 Desember en het 5 op die Richterskaal geregistreer.
Die brug is in 1962 gebou en daar is vermoedelik nie voorsiening gemaak vir die hoeveelheid vrag en verkeer wat dit nou moet hanteer nie.
Sakebedrywighede op die dorp word negatief geraak, sê mnr. André Mayer van Fit-it.
“Ons is regtig stil. Gewoonlik in oestyd kan ons nie voorbly nie. Alles is ’n probleem. Die koeriers wil nie die grondpaaie ry om aflewerings te doen nie.”
Vir Kakamas se mense is die gekraakte brug egter nie ’n verskoning om nie by die werk te kom nie. Die mense het baie planne.
Bedags word skoolkinders en werkendes alkante van die brug op- en afgelaai en weer verder vervoer nadat hulle te voet oor die brug stap.
Inkopies is ’n nuwe ondervinding.
“Jy kyk nie meer na die prys per kilogram van jou inkopies nie, jy kyk hoe swaar jou pakkies gaan weeg wat jy oor die brug moet dra,” sê mev. Ilana Meyer.
Dan is daar die romantiese prokureur, mnr. Gideon Van der Westhuizen, wat die kans aangegryp het om sy vrou te verras vir Valentynsdag.
“Ek het net gedink, wanneer gaan mens dan nou weer die geleentheid kry om ’n glasie sjampanje op ’n brug oor die Oranjerivier te drink op Valentynsdag?”
Hy het die aand haarfyn beplan.
“Ek het haar net gevra dat sy mooi aantrek, ons gaan so ’n bietjie uit.
“Ek het my suster gevra om ’n tafel vir ons te dek op die brug.
“Ek het toe na die brug gery en toe ons oorstap, het die tafel en die sjampanje daar vir ons gewag.”
Wat hy volgende jaar gaan doen, weet hy nie.
“Dit gaan groot beplanning neem om dié aand te top.”
- Volksblad