ANC stof net ou projekte af, sê DA
2012-02-22 22:28
KIMBERLEY. – Die DA vermoed die ANC-provinsiale regering het slegs ou onvoltooide projekte van die rak afgehaal en afgestof en in die provinsiale rede probeer voorgee dit is nuut.
Mnr. Andrew Louw, die DA-leier in die Noord-Kaap, sê hy is teleurgesteld.
“Ons gaan vorige toesprake bestudeer en sien watter projekte word jaar ná jaar as nuwes voorgehou.“Die toepraak was futloos, oninspirerend en sonder duidelike rigting. Dit speel op ou emosies. Sy (die premier) het geen rekenskap gegee vir die provinsie se swak finansies nie. Hul ‘operasie skoon oudit’ is ’n leë droom. Sy verwys wel na die swak ouditverslag deur te sê die departemente is meer deursigtig. Niks is gesê oor tugstappe teen diegene wat verantwoordelik is vir die massas ongewone en ongemagtigde uitgawes nie.
“Geen nuwe werk is deur die provinsie geskep nie. Die uitgebreide werkprogram is eintlik ’n nasionale regeringsprojek.
Die Noord-Kaapse Ekonomiese Ontwikkelingsagentskap verkeer eintlik in ’n hengse gemors. Ander projekte is slegs in ’n beplanningsfase.
“Die provinsie en sy munisipaliteite is geensins toegerus om toerisme te bevorder nie. Hoe kan ons onsself bemark as ’n bestemming vir ektreme sportsoorte as ons staatsoorde in ’n haglike toestand is?
“Die Noord-Kaapse regering wil alewig die wiel herontwerp. Daar is ’n gebou langs die Kimberley-stasie wat gebruik kan word om diamante te verryk.
“Die aankondiging van die verbetering van kommunikasietegnologie in die John Taolo Gaetsewe-distrik is bemoedigend.
“Daar was geen terugvoer oor duur projekte soos die Maloof Money Cup nie. Daar is ’n hele paar landbouprojekte wat nie produktief is of oeste lewer nie. Dog wil die regering weer geld hierin pomp.
“Die premier kon steeds nie die swak matriekuitslae verklaar nie. Sy spog met dié wat wel geskryf het, maar vergeet om te sê hoeveel leerlinge skole vroegtydig verlaat.
“Die provinsie se gesondheid is kritiek. Tientalle professionele mense verlaat die provinsie, studente kom nie kontrakvoorwaardes na nie en die Kubaanse leerprogram is onder verdenking. Die regering spog oor die nuwe ambulanse, maar wie gaan dit beman? Dit is kommerwekkend dat tuberkulosegevalle steeds toeneem.
“Ons wil eerder weet wanneer die psigiatriese hospitaal klaar gaan wees en wie daar gaan werk.
“Boere het ook nog geen geld gekry ná verlede jaar se vloede nie. Die voorwaardes is ook heeltemal te streng,” sê Louw.
- Volksblad