Sorg dat die beeldskone clivias in jou tuin nie te warm kry nie
2010-03-06 06:00
Alle plante het vier fundamentele behoeftes om suksesvol te kan bestaan: water, temperatuur, (son-)lig en voedingstowwe.
Temperatuur en lig gaan hand aan hand omdat sonlig in die natuur die bron van albei is.
Dit beteken die omgewingstemperatuur en hoe lank die dag is, of blootstelling aan lig, is baie nou aan mekaar verwant.
Clivias (of boslelies) hou nie van hoë temperature nie. Die plante groei in die somermaande glad nie of baie min.
Hulle groei goed in temperature van 18 - 28 °C en waarskynlik optimaal teen 20-25 °C. Teen 30 °C begin die groeitempo waarneembaar afneem, en teen 38 °C begin die stomas (huidmondjies) aan die onderkant van blare effens toemaak om oormatige waterverlies te beperk.
Warm temperature is dus baie onwelkom en die blare sal wys as die plant te warm kry.
Clivias reageer op wisselende temperature, veral wat blomvorming betref. Ernstige kwekers wat op skoue meeding, het meestal kweekhuise waar omstandighede beter beheer kan word. In die tuin sal koue in die winter die plant stimuleer om te blom sodra dit warmer begin word in die lente.
Clivias moet ’n gesonde blaarfabriek en ’n gesonde wortelstelsel hê. Hulle groei die beste in grond met ’n pH van 5 tot 6,5.
Die pragtige diep kleure van ’n Clivia miniata. Foto: Lientjie Mentz
Aard ook in houers
Die beskermde inheemse boslelie Clivia miniata is helderoranje, salmpienk of geel en blom in die lente. Hulle floreer in volskaduwee, spikkelskaduwee of met oggendson. Hulle aard ook goed in houers op die patio. Clivias hou van komposryke grond en gereelde voeding, veral vroeg in die lente voordat hulle blom.
Skouspel
Clivias sorg veral in September vir ’n skouspel in die tuin. Hulle het trosse trompetvormige blomme met stuifmeeldrade wat prominent vertoon. Al wat clivias eintlik bedreig, is slakke. Jy kan ook cliviasaad koop en self plante kweek, maar dit sal so vier tot ses jaar neem van ontkieming totdat die plantjies blom.