Maak stukkie vir stukkie
2010-03-06 06:00
- Artikelopsies
- Deel
- Kry Volksblad op
Mosaïekkuns het twee kante,” ?vertel Ira Bekker, eienaar van Studio Ira Bekker, wat spesialiseer in mosaïekkuns.
“’n Mens kan dit as ’n kunsvlytprojek aanpak of jy kan ’n volskaalse kunswerk daarmee skep.”
Volgens Bekker is mosaïek ’n toeganklike medium. “As jy ’n fout maak, of nie hou van wat jy gedoen het nie, verwyder jy net die teeltjie.
“Studente wat my klasse bywoon, strek van driejarige kinders tot bejaarde vroue. ’n Mens hoef nie ondervinding in ’n kunsmedium te hê om mosaïek te kan doen nie.”
Basiese toerusting
’n Teëlsnyer, om jou teëltjies kleiner te sny
’n Nipper, waarmee jy jou teëls in die gekose vorm sny.
Jou materiale
Bekker sê as dit by teëltjies kom, is die keuse legio. Sy maak gebruik van keramiek, porselein- en glasteëls, maar het ook ’n voorliefde vir optelgoed en knopies.
“Mosaïek kan ’n duur stokperdjie wees, maar soos met alles hang dit af waar jy jou materiale koop.”
Sy klop ook gereeld by pottebakkerye en teëlwinkels aan om gebreekte ware en tweedehandse goed te koop.
“As jou fyn porseleinkoppies breek, is daar geen rede om dit weg te gooi nie. Jy kan dit net weer in ’n mosaïek gebruik.”
Plak dit vas
Jou keuse van gom hang af van die oppervlak waarop jy werk en waar die mosaïekwerk gebruik gaan word.
As jou mosaïek binne gaan staan en nie aan die water of elemente blootgestel gaan word nie, is gewone houtlym voldoende, sê Bekker.
In vertrekke soos badkamers en met meubels wat buite gaan staan, is teëlgom ’n beter keuse.
Die pleisterklei wat jy tussen die teëltjies invoeg, moet ook met ’n bindingsvloeistof gemeng word as dit aan vog of die elemente blootgestel gaan word.
“Onthou ook dat die oppervlak waarop jy mosaïek gaan doen klaar geskik moet wees vir die doel waarvoor jy dit gaan gebruik. ’n
Oppervlak wat nie waterdig is nie, gaan nie deur die mosaïekwerk geseël word nie,” waarsku sy.
Ek wil dit ook doen
Bekker sê hoewel enigiemand mosaïekwerk kan doen, is dit goed om aan die begin eers ’n bietjie leiding te kry.
“Ek stel voor mense moet eers ’n klas of twee bywoon. Hulle sal mosaïekwerk daarna baie meer geniet.”
Sy sê dit besweer ook mense se vrees dat hul eerste poging tot mosaïek ’n mislukking gaan wees.
“In my beginnerslesse werk ons gewoonlik op plat oppervlakke omdat dit makliker is as voorwerpe met kurwes.
“Ronde oppervlakke verg meer beplanning omdat jy net ’n derde van die oppervlak sien en die teëltjies baie fyner moet sny,” verduidelik sy.
Mosaïek-ateljees
Studio Ira Bekker (Johannesburg)
Hoek van 9de straat en 7de laan, Melville
083 739 7139
www.studioirabekker.co.za
Mosaic Works (Kaapstad)
Eenheid 2, Peter Park, hoek van Montaguerylaan en Marconistraat, Montague Gardens
021 551 2532
www.mosaicworks.com
Mosaic Arts (Pretoria)
Siersteenstraat 107, Silvertondale
012 804 7392
www.mosaicarts.co.za
Crafts Step-by-Step (Bloemfontein)
Emily Hobhouseplein, Dan Pienaarrylaan
079 399 5628
@Art.Com (Bloemfontein)
Reidstraat 20, Westdene
051 448 0499
Polka Dot (Bloemfontein)
The Square: Pretty Garden-leefstylsentrum,
Langenhovenpark
082 769 1545